Бэҕэһээ Таатта улууһун Ытык Күөлүгэр «Олимпийскай II микро-оройуоҥҥа» саҥа хочуолунай «ОДьКХ» ГУП филиалын күүһүнэн үлэҕэ киирдэ. Саҥа эбийиэккэ эбии 128 саҥа туһанааччы холбонно.
«Хочуолунай акылаатын 2015 сыллаахха түһэрбиппит. Дьиэтин тимир каркааһынан туттубут, Ижевскэй собуокка оҥоһуллубут чоҕунан оттуллар 5 хочуолу таҥан туруордубут. Оттук сезона саҕаланыытыттан 1,44 МВт кыамталаах икки хочуолу оттобут, урукку дьиэлэри кытта саҥа холбоммут чааһынай дьиэлэри итиинэн хааччыйар кыахтаах. Быйыл сайын чааһынайдары холбуур сыалтан эбии 3,6 км уһуннаах киин ититэр ситими тартыбыт», – диэн Тааттатааҕы филиал дириэктэрэ Дмитрий Павлов кэпсээтэ.
Саҥа эбийиэги үлэҕэ киллэрэр үөрүүлээх тэрээһиҥҥэ Таатта улууһун баһылыга Михаил Соров, «ОДьКХ» ГУП генеральнай дириэктэрэ Виктор Омуков кытыннылар.
Саҥа хочуолунайы тутуу 2018 сылга түмүктэниэҕэ. Эбии 2,5 МВт кыамталаах үс хочуолу туруоруохтара. Оччоҕуна хочуолунай 350-тан тахса чааһынай дьиэни итиинэн хаачыйар кыахтаныаҕа.
Александр ТАРАСОВ, «Саха сирэ» хаһыат, https://edersaas.ru