Цифровой телевидениенэн хааччыйыы бырагырааматыгар олоҕуран, быйыл өрөспүүбүлүкэҕэ сүүстэн тахса станция тутуллуохтаах. Бу күннэргэ Таатта улууһун сэттэ нэһилиэгэ цифровой телевидениеҕа холбонно.
Анивера Акимова, «Саха сирэ» хаһыат, edersaas.ru
«Телевидение уонна радио биэриилэрин Россиятааҕы ситимэ» хампаанньа Саха сиринээҕи филиалын исписэлиистэрэ бэлиэтииллэринэн, цифровой телевидение хаачыстыбата үчүгэйин таһынан, элбэх ханаалы буор босхо көрүөххэ сөп. Билигин Дьокуускайга 20 ханаал көстөр.
Телевидение, радио биэриилэрин сайыннарыы тус сыаллаах федеральнай бырагыраамаҕа олоҕуран, былырыын күһүн Таатта улууһун Чычымах, Харбалаах, Даайа Амма нэһилиэктэрэ цифровой ханаалларга холбоммуттарын туһунан дьаһалта исписэлииһэ Анна Яковлева иһитиннэрдэ. Онтон билигин Ытык Күөл, Боробул, Чөркөөх, Кыйы эбии ханааллары босхо көрөр кыахтаннылар. «Телевидение уонна радио биэриилэрин Россиятааҕы ситимэ» Саха сиринээҕи филиалын сүрүн инженерэ Александр Неустроев Тааттаҕа тиийэн, цифровой формакка холбоон, олохтоохтор “Бастакы ханаал», «Россия-1», “Матч-ТВ”, «Россия-24», “Культура”, “НТВ”, “Петербург – 5 канал”, “Карусель”, «Россия общественнай телевидениетэ», «ТВ-Центр» ханааллары көрөр буоллулар.
Анивера Акимова, «Саха сирэ» хаһыат, edersaas.ru
Хаартыска: интернеттэн.