Томпо улууһугар Таба сыла түмүктэннэ

Ааптар: 
Бөлөххө киир:

Төрүт үгэстэргэ тирэҕирэн, сайдыыга хамсааһыны таһаарбыт Томпо национальнай (эбээн) нэһилиэгэ Таба сылын түмүгүнэн, улуус бастыҥ нэһилиэгэ буолла.

edersaas.ru

Хотугу омуктар төрүт дьарыктарын итиэннэ Томпо национальнай (эбээн) нэһилиэгин сайыннарар сыалтан ааспыт 2017 сыл Томпо улууһугар Таба сылынан биллэриллибитэ. Өрөспүүбүлүкэ бүддьүөтүттэн улууска тыа хаһаайыстыбатын өйөбүлүгэр 76 мөл. 416 тыһ. солк., ол иһигэр таба салаатыгар 40 мөл. 375 тыһ. солк. көрүллүбүтэ. Оттон улуустан тыа хаһаайыстыбатыгар 6 мөл. 468 солк., ити иһигэр таба иититигэр 3 мөл. 211 тыһ. солк. тыырыллыбыта. Бу үп табаһыттар хамнастарыгар, үлэ усулуобуйатын тэрийиигэ, Табаһыттар Бүтүн Россиятааҕы сийиэстэригэр, VI Аан дойдутааҕы конгресстарыгар туһаныллыбыта.

Томпо национальнай (эбээн) нэһилиэгэр дьаһалта баһылыга Надежда Васильевна Кладкина-Клышейко салалтатынан чахчыта даҕаны элбэх үлэ ыытыллар. Ол курдук хаарбах дьиэттэн дьону көһөрүү бырагырааматынан Тополинай бөһүөлэгэр 8 Мвт. кыамталаах саҥа хочуолунай тутулунна, тоҕус элбэх кыбартыыралаах дьиэ үлэҕэ киллэрилиннэ, тыа сирин территорияларын бигэтик сайыннарыы бырагырааматынан дьиэ тутуутугар көмөнү биир ыал ылла. Тэриллибитэ 85 сылын бэлиэтээбит олохтоох балыыһа өрөмүөннэннэ уонна саҥа тэрилинэн хааччылынна. Олохтоохтор нэһилиэккэ, улууска, ону ааһан өрөспүүбүлүкэҕэ тэриллэр дьаһалларга көхтөөхтүк кытталлар. Үгүстэн боччумнаахтарын холобурдаатахха, Ил Дархан бириэмийэтин учууталлар өрөспүүбүлүкэтээҕи куонкурустарын кыайыылааҕа, “Тугутчаан” уһуйааҥҥа эбээн тылын үөрэтэр Екатерина Голикова итиэннэ “Сыл дьиэ кэргэнэ— 2017” фестиваль кыттыылаахтара элбэх оҕолоох табаһыттар Антонина Лебедева, Дмитрий Голиков туттулар.

Нэһилиэк дьаһалтата өбүгэ төрүт дьарыгар, таба иитиитигэр, ахсаабат кыһамньытын уурар. Бу салааҕа “Томпо” ТПК (фактория), икки аҕа ууһун общината уонна икки бааһынай хаһаайыстыбата дьарыктаналлар. Кинилэр холбоон 7 тыһ. 543 («Томпо» ТХПК 6 тыһ. 26, П.Е.Погодаев аатынан аҕа ууһун общината 875) табалаахтар. Былааннарын табаны чөл тутууга 82 % толордулар, тугуту ылыы 33 %-ҥа тэҥнэстэ, бу омос көрдөххө намыһах курдук эрээри, адьырҕа кыыл (эһэ, бөрө) элбээбит кэмигэр бэрт эрэйинэн ситиһиллэр көрдөрүү.

Соторутааҕыта Таба сылын түмүктүүр тэрээһин буолан ааста. Онно сыллааҕы үлэ түмүктэрэ таһаарылынна, бастыҥнар чиэстэннилэр. П.Е.Погодаев аатынан аҕа ууһун общината (баһылык Мария Погодаева) — «Бастыҥ таба хаһаайыстыбата», М.С.Лебедев аатынан община табаһыта Федор Протопопов «Бастыҥ табаһыт», «Томпо» ТПК (фактория) чуумсуга Надежда Амосоваҕа «Бастыҥ чуумсук», Дмитрий Голиков дьиэ кэргэнэ «Көһө сылдьар бастыҥ ыал» номинация хаһаайыннарынан буоллулар. Бастыҥ наставнигынан фактория кырдьаҕас табаһыта, 75 саастаах Федор Куприянов, бастыҥ биригэдьииринэн Вениамин Баишев, бастыҥ табаһыт-бөрөһүтүнэн Георгий Ефимов (иккиэн «Томпо» фактория үлэһиттэрэ) ааттаннылар. Улуус баһылыгын 100 тыһ. солк. гранын удьуор табаһыт Федор Куприянов дьиэ кэргэнэ тутта. Үтүө суобастаах үлэлэрин иһин «Томпо» фактория үлэһиттэрэ Николай Семенов, 6 -дээх ыстаада биригэдьиирэ Аркадий Харлампьев, зооветисписэлиис Ольга Протопопова, суоппар Олег Павлов, бухгалтер-кассир Мария Турантаева, табаһыттар Юрий Челкаков, Зиновий Захаров, Станислав Погодаев, Валерий Абрамов, Гаврил Семенов, Владимир Слепцов, Тимур Дидыч, Виталий Николаев, чуумсуктар Федора Замятина, Софья Лебедева, хараас сэбиэдиссэйэ Константин Охлопков, аҕа ууһун общиналарын табаһыттара Александр Погодаев, Петр Баишев, Федор Протопопов улуус Баһылыгын Бочуотунай грамотатынан бэлиэтэннилэр.

Томпоттон Евдокия Неустроева edersaas.ru сайтка анаан.

Хаартыскаҕа ааптар түһэриилэрэ.

+1
0
+1
0
+1
0
+1
0
+1
0
+1
0
+1
0