Быраабы араҥаччылыыр, накаастабылы толорор уорганнарга биир интэриэһинэй, дьон болҕомтотун куруук тардар салаанан кинологтар сулууспалара буолар.
edersaas.ru
«Служебнай» дэнэр ыттары, биллэн турар, саамай сэргээччилэринэн оҕолор буолаллар. Итинэн сибээстээн, Оҕо көмүскэлин күнүнэн, Табаҕа орто оскуолатын алын кылаастарын үөрэнээччилэрэ бу бөһүөлэккэ баар 7 №-дээх кытаанах эрэсиимнээх холуонньа кинологическай сулууспатыгар ыалдьыттаатылар.
Бу экскурсияны ыытарга оскуола салалтата бэйэтэ көрдөспүт, холуонньа дьаһалтата онуоха үөрүүнэн сөбүлэспит. Бу туһунан РФ Накаастабылы толорор федеральнай сулууспатын Саха сиринээҕи управлениетын пресс-сулууспата иһитиннэрдэ.
Кылаастар салайааччылара сүүрбэттэн тахса оҕону батыһыннаран, кинологтарга тиийбиттэр. Экскурсия кэмигэр кинологтар сулууспа ыттара хайдах аһыылларын-сииллэрин, көрүллэллэрин, тугу сатыылларын көрдөрбүттэр. Холобура, массыынаҕа, атын да сиргэ кистэммит маллары хайдах булалларын, буруйдааҕы хайдах туталларын.
Тэрээһин бүтүүтүгэр ыалдьыттар интэриэһинэй экскурсия иһин махтаммыттар, оҕолор ыттары кытта үөрэ-көтө хаартыскаҕа түспүттэр.
РФ НТУ кинологическай сулууспатын начальнига Сергей Болуров:
— Холуобунай-исполнительнай систиэмэҕэ сулууспалыыр ыттар холуонньалары эрэллээхтик харабыллыыллар, буруйу оҥорооччулары тутарга көмөлөһөллөр, ону таһынан, хаайыыга бобуулаах маллары киллэрэ сатааһыны бэрэбиэркэлээһиҥҥэ кытталлар. Киһиэхэ бэриниилээхтик сулууспалыыр түөрт атахтаах доҕотторбутугар кыһамньылаахтык сыһыаннаһыы, көрүү-истии — биһиги ытык иэспит. Бүгүн экскурсияҕа сылдьыбыт үөрэнээччилэргэ ити өйдөбүлү тиэрдэргэ кыһалынныбыт.
Вера МАКАРОВА, «Саха сирэ» хаһыат, edersaas.ru
Хаартыска: РФ НТУ ФС ССУ пресс-сулууспата.