Ааспыт өрөбүл коммунальнай хаһаайыстыба үлэһиттэрин күнэ этэ. Бүтүн Россиятааҕы IV табаһыттар сийиэстэрин чэрчитинэн, кулун тутар 19 күнүгэр Дьокуускай куорат «Күөх хонуутугар» табаһыттар оонньууларыгар өрөспүүбүлүкэ 18 улууһуттан, Россия регионнарыттан 300 тахса киһи муһунна. Дьон ордук таба сүүрдүүтүн сэргээн көрдө.
Александр ТАРАСОВ, «Саха сирэ» хаһыат, edersaas.ru
Дьэ манна тыалы кытта тэҥҥэ айанныыр табалардаах «ОДьКХ» ГУП Эбээн-Бытантайдааҕы филиалын үлэһитэ Нарыйа Слепцова бастаан соһутта. Нарыйа кэпсиир:
— Табаларым сүүрэн иһэн, эмискэ уҥа диэки салайбыттарыгар, наартам түҥнэстибитэ. Төһө да атыттар ырааппыттарын иһин, санаабын түһэрбэккэ, наартабын көннөрөөт, туох баар күүспүн-уохпун мунньунан, табаларбын харса суох сүүрдэргэ кыһалынным. Киһи соһуйуох, кырдьык, табаларым туох баар муҥ кыраайдарынан түстүлэр. Этэргэ дылы, кулгаахпар тыал тыаһа эрэ иһиирэргэ дылы этэ. Бэрт аҕыйахтык ойутаат, бастакы, иккис, үһүс күрэхтэһээччилэрбин, салгыы барыларын ситэттээтим. Эбээн-Бытантай табалара саамай түргэнник сүүрэллэрин уруккуттан билэр этим. Ону бу да сырыыга толору итэҕэттилэр.
Табаһыттар удьуордара
Нарыйа кыра эрдэҕиттэн көһө сылдьар ыстаада олоҕун, ис дьиҥин үчүгэйдик билэр эбит. Эбээн-Бытантай улууһун табаһыттарын удьуордара. Билигин аймахтарыгар 800-тэн тахса таба баар. Туундараҕа билигин саастаах көлүөнэ эрэ дьон табалары көрөллөр-харайаллар, эдэрдэр табаһыт хамнаһа кыратын иһин, улаханнык ахсарбаттар диэн кэпсиир.
Нарыйа ХИФУ-га үөрэнэн, инженер идэтин баһылаабыта. Дьокуускай куоракка хаалыан баҕарбыта эрээри, төрөөбүт дойдутун уолугар кэргэн тахсыбыта, уол оҕоломмуттара. Билигин «ОДьКХ» ГУП Эбээн-Бытантайдааҕы филиалыгар исписэлииһинэн үлэлиир. Кини иллэҥсийдэ даҕаны уонна уоппускатын кэмигэр дьиэ кэргэнин кытта ыстаадаҕа тахсар.
«Табаны 10 саастаахпар мииммитим»
– Кыра эрдэхпиттэн убайдарым табаны миинэллэрин, көлүйэллэрин көрө-көрө олус ымсыырар этим уонна мииниэхпин, көлүйүөхпүн олус баҕарарым, – диэн Нарыйа кэпсиир. – 10 сааспын туолбуппар дьонум табаны миинэрбин көҥүллээбиттэрэ. Дьэ ити кэнниттэн табаны өрүү миинэр, көлүйэр буолбутум. Оскуолаҕа үөрэнэр кэммэр күрэхтэргэ өрүү бастакы миэстэ буоларым. Былырыын ыытыллыбыт өрөспүүбүлүкэтээҕи күрэхтэһиигэ үһүс миэстэни ылбытым. Бу сырыыга эрчиллэр бириэмэм адьас суоҕа, үс күн бэлэмнэммитим. Ол гынан баран, табаларым барахсаттар үчүгэй буоланнар, бастаатым. Түргэннэр, күүстээхтэр уонна, саамай сүрүнэ, киһи салайарын истэллэр.
* * *
Табаны сүүрдүүгэ кэрэ аҥаардарга бастакы миэстэни ылбыкка, «Буран» бэлэхтээтилэр. «Үлэбэр «Буранынан» сылдьыаҕым», — диэн Нарыйа кыыс күлэн кэбиһэр.