Дьокуускайга кулун тутар 16 күнүгэр Тыа хаһаайыстыбатын академиятын мунньахтыыр саалатыгар Саха сирин табаһыттарын III сийиэһэ үлэлээтэ.
Василий НИКИФОРОВ, https://edersaas.ru
23 улуустан 165 дэлэгээттиин (регистрацияламмытынан — 133) ыҥырыылаахтары холбоон, барыта 173 кыттыыны ылла. Улахан сугулааны СӨ Арктика дьыалаларыгар судаарыстыбаннай кэмитиэтин бэрэссэдээтэлин бастакы солбуйааччы Иван Павлов салайан ыытта.
Сийиэс дэлэгээттэрин Россия табаһыттарын сойууһун бэрэсидьиэнэ Дмитрий Хороля уонна Судаарыстыбаннай Дуума дьокутаата, РФ Хоту, Сибиир уонна Уһук Илин регионнарын аҕыйах ахсааннаах төрүт норуоттарын ассоциациятын бэрэсидьиэнэ Григорий Ледков эҕэрдэлээтилэр. “Сэбиэскэй былаас саҕана Россияҕа 2,5 мөлүйүөн табалаах этибит, билигин 1 мөл. 600 тыһ. табалаахпыт. Ол иһигэр Ямал биир да табатын энчирэппэтэ, бүгүн 700 тыһ. табалаахпыт. Тоҕо диэтэххэ, биһиги ыстаадаларга дьахталларбытын дьиэ кэргэнинэн илдьэ сылдьабыт, ол иһин табабыт – чөл. Эһиги эмиэ дьахталларгытын харыстааҥ, оччоҕо табаҕыт элбиэ”, — диэн алҕаата Дмитрий Оттович.
Арктика дьыалаларыгар судаарыстыбаннай кэмитиэт бэрэссэдээтэлэ Алексей Киселев дакылаатын, СӨ табаһыттарын ассоциациятын бэрэсидьиэнэ Семен Аммосов отчуотун истии кэнниттэн уонча дэлэгээт тыл эттэ. Күүтүллүбүтүн курдук, үгүстэр бөрөнү сонордоһорго бөртөлүөтү күүскэ туһаныыны үбүлүүргэ, дьааты туттары көҥүллүүргэ туруорустулар. Саҥа бырайыагынан элбэх табалаахтар хамнастара үрдүүр буолбутуттан үөрэллэрин биллэрдилэр.
Үһүс сийиэс биир бэлиэ түгэнинэн СӨ табаһыттарын ассоциациятын бэрэсидьиэнин талыы буолла. Манна соҕотох хандьыдаат туруоруллан, Өлүөхүмэ улууһун Тээнэ национальнай нэһилиэгин баһылыга, ити иннинэ табаны иитии салаатыгар 20-чэ сыл үлэлээбит Арсентий Николаев ассоциация бэрэсидьиэнинэн талылынна. Семен Аммосов бырабылыанньа састаабыгар толорооччу дириэктэринэн хаалларылынна. Маны тэҥэ, дэлэгээттэр Россия табаһыттарын IV сийиэһигэр Саха Өрөспүүбүлүкэтин аатыттан кыттарга 26 киһини дэлэгээтинэн талан бигэргэттилэр. Бу иһигэр Ил Түмэн бэрэссэдээтэлин бастакы солбуйааччы Анатолий Добрянцев баар, кини табаһыттар дойду таһымнаах ассоциацияларын бэрэсидьиэнигэр хандьыдаатынан мэктиэлэннэ. Сийиэс үлэтин резолюцияны ылыынан түмүктээтэ.
Василий НИКИФОРОВ, https://edersaas.ru