Инбэлииттэр аан дойдутааҕы күннэригэр анаммыт декада саҕаланна. Инбэлииттэри үлэнэн реабилитациялыыр үөрэтэр-производственнай киин (салайааччы Николай Местников) декада чэрчитинэн, сэтинньи 18-19 күннэригэр дьаарбаҥка-быыстапканы тэрийэр.
edersaas.ru
Үтүө үгэскэ кубулуйан, сыл аайы ыытыллар быыстапка быйыл Тутуу ырыынагын ( Жорницкай уул. 33, «Кыһыл Дьиэҕэ») быыстапкалыыр саалатыгар буолуоҕа.
Сарсын күнүс 12 чаастан дьаарбаҥка-быыстапканы үөрүүлээхтик аһыыга СӨ үлэҕэ уонна социальнай сайдыыга миниистирин солбуйааччы Иван Никифоров, инбэлииттэри социальнай реабилитациялааһыҥҥа отдел начаалынньыга Анна Сыромятникова, РФКП Саха сиринээҕи рескомун бастакы сэкирэтээрэ Виктор Губарев, куорат Дууматын дьокутаата Айаан Васильев, СӨ Эргиэн-промышленнай балаататын вице-президенэ Родион Федоров уо.д.а. кыттыахтара.
Дьаарбаҥка-быыстапкаҕа кэлбит киһи удамыр сыанаҕа хаачыстыбалаахтык тигиллибит утуйар таҥас кэмпилиэгин, дьиэҕэ кэтиллэр сылаас таҥастары, матараастары, үлэ анал таҥастарын, ону сэргэ, тутуу тэриллэрин (остуоллары, устууллары, долбуурдары уо.д.а), полиграфия оҥоһуктарын, сувенирдары уо.д.а. атыылаһыаҕа.
Кэккэ табаардарга 10-20 бырыһыаннаах чэпчэтиилэр көрүллэллэр.
Реабилитациялыыр киин бүддьүөт үбүттэн дотация ылбатынан, үпкэ туруга туһааннаах тэрилтэлэр уонна интэриэстээх дьон сакаастарыттан быһаччы тутулуктаах. Онон, быыстапкаҕа кэлэн, табаар атыыласпыт хас биирдии киһи доруобуйаларыгар хааччахтаах дьоҥҥо көмөлөһөр.
Надежда ЕГОРОВА, «Саха сирэ» хаһыат, edersaas.ru