Бырабыыталыстыба мунньаҕа табаны иитии сокуонун саҥа бырайыагын көрдө.
Табаны иитии төрүт олохтоох хотугу омуктар (эбээннэр, эбэҥкилэр, чукчалар, дьүкээгирдэр, долгааннар, хотугу сахалар) сүрүн дьарыктара, олохторун илгэтэ буолар. Саха өрөспүүбүлүкэтигэр «Табаны иитии туһунан сокуон» 1997 с. ылыллыбыта.
Раиса Сибирякова, «Саха сирэ» хаһыат, edersaas.ru
Онтон ыла лоп курдук сүүрбэ сыл ааста, бу кэм устата элбэх уларыйыы таҕыста. Сокуон ылылларын саҕана сүрүн болҕомто табаны тыыннаах хаалларарга туһаайыллыбыт буоллаҕына, билигин хаһаайыстыбалар арыый бигэтийэн, табаарынай таһымҥа таҕыстылар.
Күн бүгүн табаны иитиигэ бас билии көрүҥүттэн тутулуга суох 106 хаһаайыстыба идэтийэр. Кинилэр холбоон 156 тыһ. табалаахтар, 37 мөл. гектар сири таба мэччирэҥэр сыһыарынан көрөллөр-истэллэр. Салааҕа барыта 1792 киһи үлэлиир, ол иһигэр 1406 табаһыт, 386 чуумсук баар.
Хаһаайыстыбалар таһымнара араас эрээри, кыһалҕалара биир. Ол – олох-дьаһах, тиэхиньикэ өттүнэн хааччыллыы мөлтөҕө, үлэһит көстүбэтэ, боруоданы тупсарар селекциялыыр-племенной үлэ ситэтэ суоҕа, эти астыыр уонна харайар аныгы тэрил тиийбэтэ итиэннэ табаны сонордоһор адьырҕа кыыл элбээбитэ буолар. Ити иһин, биэдэмистибэлэр ыккардыларынааҕы оробуочай бөлөх Саха сирин табаһыттарын уонна төрүт олохтоох хотугу омуктар Ассоциацияларын кытары тустаах федеральнай сокуоҥҥа сөп түбэһиннэрэн, саҥа сокуон барылын ырытан оҥордулар.
Раиса СИБИРЯКОВА, «Саха сирэ» хаһыат, edersaas. ru