Аллайыахаттан сылдьар Андрей Дуткин муостан кыһар дьоҕура аҕатыттан бэриллибит.
Елена ПОТОЦКАЯ, «Саха сирэ» хаһыат, https://edersaas.ru
Оскуоланы бүтэрээт, эдэр киһи Дьокуускайдааҕы технология уонна дизайн коллеһыгар үөрэнэ киирбит. Дойдутугар биир сыл үлэлээн баран, Дьокуускайга саастарын ситэ илик оҕолору реабилитациялыыр кииҥҥэ эбии үөрэхтээһин салаатыгар үлэҕэ киирэр. Онно үөрэнээччилэрин муоһу кыһарга үөрэтэр.
— Бэйэм туох эрэ туһалааҕы айыахпын-тутуохпун олус баҕарар буолан, арааһы бары толкуйдуур этим. Онтон икки сылы быһа өйбөр сурунаал остуолун оҥорон көрө сылдьан баран, тайах муоһуттан сэлии кыылы оҥорбутум. Бу остуолларым дьиэбэр киэргэл эрэ быһыытынан турбаттар, сурунарбар туттабын, — диэн кэпсиир эдэр киһи.
Андрей Дуткин тайах муоһуттан оҥорбут сыаналаах мала дьон болҕомтотун тарта. Маннык сурунаал остуолун оҥорторуон баҕалаах дьон элбэх.
— Остуол төгүрүк тааһын анаан сакаастаан аҕалтарбытым. Олоҕо — бэс мас. Тирээбилэ — тайах муоһа. Онно эбии сэлии кыыл оҥоһуга. Быһа, холуйан сүүс тыһ. солк. тахса сыаналаах буолуон сөп да, бэйэбэр оҥостубут буоламмын, сыана быһа иликпин. Бу «Арктика эйгэтэ» быыстапкаҕа үлэлэрбин дьон дьүүлүгэр көрдөрө аҕаллым, — диэн кэпсиир Андрей.
Елена ПОТОЦКАЯ, «Саха сирэ» хаһыат, https://edersaas.ru
Ааптар хаартыскаҕа түһэриитэ.