Мэҥэ Хаҥалас улууһугар «Таммахтар» литературнай холбоһук 1971 сыллаахха тэриллиэҕиттэн, күн бүгүнүгэр диэри тигинэччи үлэлээн кэллэ. Бу холбоһугу саха суруналыыстыкатын аксакала Иван Брызгалов, суруйааччылар Иван Сысолятин, Иннокентий Сосин, Константин Сосин сатабыллаахтык салайбыттара. 2007 сылтан Августина Владимирова-Хабарова муоһалыыр, үлэни тиһиктээхтик тэрийэр.
Холбоһук дьоно-сэргэтэ кэмиттэн-кэмигэр түмсэн үлэлэрин-хамнастарын билсэллэр, ырыталлар, хардарыта сүбэ-ама бэрсэллэр, тэрээһин арааһын тэрийэллэр, улуустар түмсүүлэрин кытары сибээһи туталлар. Соторутааҕыта И.М.Сосин аатынан киин бибилэтиэкэҕэ «Таммахтар» бэйэлэрэ этэллэринэн, өтөрүнэн буолбатах үөрүүлээх бэлиэ күн буолла. Ол курдук, түөрт ааптардара: Лидия Андросова — «Бэйэҕэ үтүөнү бүөбэйдиэх», Евдокия Попова-Айыына — «Ийэ куппар иҥэрэн», Изабелла Романова — «Ийэ илиитин сылааһа», Инна Николаева — «Мин бэлэҕим» диэн быйыл (2018 с.) тахсыбыт кинигэлэрин сүрэхтэниитэ үрдүк таһымнаахтык буолла.
— «Таммахтарга» быйаҥнаах уонна үөрүүлээх дьыл, — диир холбоһук салайааччыта Августина Хабарова. — Бу үөрүүлээх, долгутуулаах тэрээһиммитигэр иэйии кынаттаах ийэлэр, дьүөгэлэрбит, айар үлэҕэ куттарын туттарбыт киэн туттар ааптардарбыт күн сирин көрбүт үлэлэрин билиһиннэрдилэр. Кинилэри хас биирдиилэрин да ылан көрдөххө, көрүөхтэн кэрэ, этиэхтэн эриэккэс дьон. Лидия Андросова РФ үөрэҕириитин туйгуна, «Саха-Азия оҕолоро» пуонда стипендиата, немец тылын учуутала. Евдокия Попова — Айыына Бүтэйдээх нэһилиэгин бочуоттаах олохтооҕо, «Дьиэ кэргэн бэлиитикэтигэр кылаатын иһин» СӨ анал бэлиэтин хаһаайката, өр сылларга ыанньыксыт сыралаах үлэтигэр үтүө суобастаахтык үлэлээн баран, билигин бочуоттаах сынньалаҥҥа олорор, айар үлэнэн утумнаахтык дьарыктанар. Изабелла Романова В.П.Ларионов аатынан Майа орто оскуолатыгар учууталлыыр, «Мэҥэбил» диэн эдэр кэрэспэдьиэннэр постарын салайар, «Кэскил» хаһыат биир сүрүн көмөлөһөөччүтэ. Инна Николаева «Мичил оҕо саадыгар иитээччинэн үлэлиир. Кини хоһоонноро сахалыы, нууччалыы тылынан бэчээттэнэллэр, ааҕааччылар болҕомтолорун тардаллар. Холбоһукпутугар маннык үтүө үлэһит дьонноохпутунан-сэргэлээхпитинэн киэн туттабыт, — диэн үөрүүтүн үллэстэр.
Бу күн кинигэлэрин ааҕааччы киэҥ араҥатыгар билиһиннэрбит ааптардар тустарынан кылгастык быһа тардан эбии сырдаттахха, чахчы да, киһи эрэ сөҕөр, хайгыыр, сэҥээрэр. Ол курдук, Л.Н.Андросова айымньылара «Саха сирэ», «Эркээйи» хаһыаттарга, «Таммахтар» холбоһук, «Кистэлэҥ иэйии» хомуурунньуктарыгар, «Чолбон» сурунаалга, о.д.а. бэчээттэнэллэр. Е.И.Попова-Айыына хас да кинигэлээх, өрөспүүбүлүкэ автоледиларын гимнэрин ааптара, өрөспүүбүлүкэтээҕи «Далбар Хотун» куонкуруска «Алаас Хотун» анал аат хаһаайката. И.Я.Романова «Айар куорсун» үөрэнээччилэр үлэлэрин хомуурунньугун оҥорбут, «Мэҥэбил» оскуола оҕолоругар аналлаах сурунаалы сүрүннээччи, о.д.а. дьоһун үлэлэрдээх. И.Н.Николаева «Тэҥҥэ чуопчаарыаҕыҥ» брошюралаах, айымньылара «Эркээйи экспресс» хаһыакка, «Колокольчик» сурунаалга бэчээттэнэллэр.
«Таммахтар» литературнай холбоһук дьоро күнүгэр оскуола үөрэнээччилэрэ, учууталлар, ааҕааччылар, тэрилтэлэр салайааччылара, нэһилиэк олохтоохторо көхтөөхтүк кытыннылар, санааларын үллэһиннилэр, дуоһуйа сынньаннылар. Айар дьоҕурдаах дьон үүнэ-сайда туралларыгар баҕардылар.
Биһиги корр., «Саха сирэ» хаһыат, edersaas.ru