«Танда» хаһаайыстыба сэбиэскэй былаас эстиэҕиттэн ыла туруорсан, дьэ, хотоннонно

Уус Алдан улууһугар урукку сопхуос саҕанааҕы хаһаайыстыбалартан хаалан, баччаҕа диэри тулуктаһан кэлбит ахсааннаах баарыттан биир саамай тонуктаахтара – «Танда» тыа хаһаайыстыбатын производственнай кэпэрэтиибэ. Кэпэрэтиип салалтата улахан мунньахтарга, көрсүһүүлэргэ хас кэлбит-барбыт тойон-хотун аайы саҥа хотон тутуутун сыҥааҕа сылайыар диэри туруорсубута, үлүннэриитэ суох, үйэ чиэппэрэ кэм ааста.

Быйыл сайын, хата, өмүрэх алҕаска таба охсунарыныы, «тандалар» аныгы технологиянан тутуллубут бэртээхэй хотонноннулар. Ааспыт нэдиэлэҕэ Тыа хаһаайыстыбатын уонна ас-үөл бэлиитикэтин министиэристибэтин өттүттэн тутуу үлэтин хонтуруоллуур боломуочуйалаах «Туймаада» хампаанньа генеральнай дириэктэрэ Александр Васильев Тандаҕа тиийэн, саҥа эбийиэги көрөн-истэн баран, «сиппит-хоппут» диэн сыаналаан тутта. Үлэни тутар аактаҕа кинини сэргэ «Танда» ТХПК бэрэссэдээтэлэ Николай Хомподоев, Байаҕантай нэһилиэгин баһылыга Иннокентий Иванов уонна хотону кылгас кэм иһигэр хаачыстыбалаахтык туппут бэдэрээтчит тэрилтэ – «Хаҥалас РИЭЛТИ» ХЭУо генеральнай дириэктэрэ Кан Терешкин илии баттаатылар.

Эргэ мас хотоннорго холоотоххо, дыбарыас тутууга 120 ыанньык биирдэ киирэн, киэҥник-куоҥнук туруоҕа. Ынах ыаһыныттан саҕалаан сүөһү хойуутун таһаарыыга тиийэ толору механизациялаах хотон күн бүгүн үлэлииргэ бэлэм буолла. Аны күһүн ынахтар сайылыктан көһөн киирдэхтэринэ, «кыстык дьиэлэрэ» сырдыга, ырааһа бэрдиттэн соһуйаннар, тиэрэ кэлэн түһэр буолуохтаахтар.

«Миниистиринэн ананаат, биһиги бырайыакпытын тута өйөөбүтүн иһин Петр Николаевич Алексеевка тус бэйэм уонна үлэһиттэрим истиҥник махтанарбытын биллэрэбит, – диэтэ төлөпүөнүнэн кэпсэтиигэ кэпэрэтиип салайааччыта Николай Саввич Хомподоев. – Матырыйаалын, оборудованиетын киллэрэн туран, барыта 41 мөл. солк. суумалаах тутуу буолла. Министиэристибэ бирикээһигэр олоҕуран, ороскуот 80 бырыһыанын өрөспүүбүлүкэ бүддьүөтүттэн субсидия көрөн толуйдулар. Онтон ордубут 20 бырыһыанын «Туймаада» хампаанньаттан 3 сыл төлөһөр дуогабарга иэс ыллыбыт. Хампаанньаҕа А.Г.Васильев, А.Е.Артемьев, А.Н.Захаров курдук производствоны иһиттэн үчүгэйдик билэр уопуттаах салайааччылар үлэлиир буоланнар, тутуу матырыйаалын саас суолбут алдьана-быста илигинэ ыытаннар, абыраатылар. Бэдэрээтчиппитигэр эмиэ табылынныбыт».

(Сиһилии «Саха сирэ» хаһыат кэлэр 09.08.2017 таһаарыытыгар ааҕаарыҥ).

Василий НИКИФОРОВ.

Хаартыскаҕа (хаҥастан уҥа): К.В.Терешкин, И.Н.Иванов, А.Г.Васильев, Н.С.Хомподоев саҥа хотону үлэҕэ тутар үөрүүлээх түгэҥҥэ.