close
Таптал — Игнатьевтар олохторун суолдьута
Олох-дьаһах

Таптал — Игнатьевтар олохторун суолдьута

Бүгүн Петр уонна Феврония Муромскайдар тапталларын уонна бэйэ бэйэҕэ бэриниилээх буолуу холобурдарын чиэстээн, Дьиэ кэргэн күнэ бэлиэтэнэр.

edersaas.ru

Петр уонна Феврония олохторо  сырдык таптал остуоруйатыгар тэҥнээх. Кинилэр холобурдарыгар тэҥнээх таптал баара буолуо диэн толкуй үөскүүр. Баар эбит!

Мин соторутааҕыта ветеринарнай наука хандьыдаата, «Саха сирин отторо» ХЭТ дириэктэрэ, СӨ Дьахталлар уопсастыбаннай сойуустарын чилиэнэ Лидия Алексееваны кытта көрсүһүүбэр, сэһэргэһээччим биир интэриэһинэй эдэр ыал туһунан кэпсээн аһарбыта. Онуоха мин бу бэлиэ күҥҥэ анаан кини кэпсээнин сурунан  ылбытым.

Алена уонна Иван Игнатьевтар, төһө да доруобуйаларынан хааччахтаах буоллаллар, бу олоххо баар ыраас тапталы, дьол амтанын толору билбит эдэр дьон.

Кинилэр бэйэ-бэйэлэрин аан бастаан 2012 сыллаахха өрөспүүбүлүкэ инбэлииттэри реабилитациялыыр лицей-интернатыгар көрсүбүттэрэ.  Дьолго дьулуһар баҕа санаа күүһэ икки сүрэххэ таптал уотун умаппыта. Спорт саалатыгар сылдьан, Ваня Аленаны сөбүлүү көрбүт уонна салпыаккаттан роза сибэкки оҥорон бэлэхтээбит.  Кини ол сибэккилэрин бэлэхтииригэр: «Мин розаларым хаһан даҕаны хагдарыйбаттарын курдук, эйиэхэ тапталым хаһан даҕаны умуллуо суоҕа». Уол кэлин үлэлээн, харчыланан, тыыннах үрүҥ розалары бэлэхтээн, Аленатын өрүү үөрдэр буолбут.

Ваня: «Кэргэн буол» диир түгэнэ эмиэ биир кэрэ остуоруйа буолан, эдэр дьон олохторун киэргэппит. Алена төрөөбүт күнүгэр уопсайга кэлэн, Ваня тобуктаан олорон, долгуйан сүрэҕин кистэлэҥин арыйарыгар … кыһыл көмүс биһилэх бэлэх ууммут!  Онуоха кыыс саҥата суох ытаан барбыт.  Хайдахтаах да киһи долгуйар түгэнэ дии. Биллэн турар, Алена үөрүүнэн Ваня олоҕун аргыһынан буоларга сөбүлэспит.

2013 сыл балаҕан ыйын 26 күнүгэр урукку «Чароит»  саалатыгар Игнатьевтар диэн дьоллоох ыал үөскээбитин биллэрэн, эдэр дьон аймахтарын ыҥыран, улахан уруу  тэрийбиттэрэ.

Бу кэмтэн ыла биэс сыл ааста. Аленалаах Ваня бэйэ-бэйэлэригэр тапталлара сылтан сыл  бөҕөргөөн иһэр. Игнатьевтар билигин икки кырачаан кыыс амарах ийэтэ-аҕата буолан, дьоллорун өссө күүһүртүлэр.

Каролина 2015 сыл самаан сайын бэс ыйын 3 күнүгэр, Николь 2017 сыл ахсынньы 14 күнүгэр томороон тымныыга күн сирин көрөн, ийэлээх аҕаларыгар тугунан да кэмнэммэт сирдээҕи дьолу бэлэхтээбиттэрэ.

Алена уонна Ваня Игнатьевтар көннөрү ыал эрэ түбүгүнэн муҥурдамматтар. Кинилэр олоххо көхтөөх дьон быһыытынан актыыбынай уопсастыбанньыктар. Ол курдук, Алена  спорка Арассыыйа таһымнаах күрэхтэһиилэргэ сытан эрэ анньыы диэн көрүҥҥэ элбэх ситиһиилэрдээх, үрүҥ көмүс, боруонса мэтээллэр хаһаайкалара. Өрөспүүбүлүкэ кэлээскэнэн сырсыыга 7 төгүллээх чөмпүйүөнэ! Ваня пауэрлифтиҥҥэ, мас тардыһыытыгар, сытан эрэ анньыыга, ядрону быраҕыыга инбэлииттэр ортолоругар кыайыы өрөгөйүн билбитэ.

Игнатьевтар  «Бииргэ олорорбутунан дьоллоохпут» диэн хаартыска куонкуруһугар кыттан, тэҥнээхтэрин булбатахтара.

Быйыл  бэс ыйын 30 күнүгэр «Таптал кыраныыссаны билиммэт» диэн өрөспүүбүлүкэтээҕи күөн-күрэскэ Алена Игнатьева түөрт түһүмэҕи эрэллээхтик туораан, кыайыылааҕынан тахсан бар дьонун үөрдүбүтэ.

Игнатьевтар — айар куттаах эдэр дьон. Алена быысыбайдаан, оҕуруонан тиһэн, араас кэрэни айан, дьиэ кэргэнигэр эбии барыс киллэрэр. Ваня “Суһаллык хаартыскаҕа түһэрии” диэн анал устуудьуйалаах. Бастакы усунуостарын төрөппүттэрэ төлөөн, ипотеканан таас дьиэҕэ  икки хостоох кыбартыыра ылбыттара. Билигин ый аайы хамнастарын сыыһыттан кирэдьииттэрин төлүү олороллор.

Бу курдук, Игнатьевтар дьиэ кэргэн  олох устун сиэттиһэн, илии-илиилэриттэн ыга тутуһан, санныларынан өйөнсөн,  олох уустук кыһалҕаларын иккиэн биир сүбэнэн туорууллар.

Киһи кинилэри киэн тутта кэпсиир, холобур оҥостор ыала буола үүннүлэр. Бу буолар киһи биирдэ олорор олоҕун сыалын толоруута, үйэлэри уҥуордуур кэрдиис кэмигэр дьоллоох дьиэ кэргэн туллар тутааҕа буолуута.

Лидия Алексеева кэпсэтиибит түмүгэр: «Мин «Арассыыйа дьахталларын туһугар» норуот баартыйатын Саха сиринээҕи салаатын чилиэнин быһыытынан инбэлииттэр ипотеканы чэпчэтиллибит быраһыанынан төлүүллэригэр уонна кэлээскэнэн сылдьар инбэлиит квотанан босхо дьоҕус массыынанан хааччылларыгар сокуон оҥорорго үлэлэһэ сылдьабын. Бу Игнатьевтар бүгүҥҥү күҥҥэ баҕа санаа ымыыта оҥостор санаалара,»— диэн бэлиэтээтэ.

Тапталлара күүстээх, бэйэ бэйэлэригэр бэриниилээх Игнатьевтар баҕа санаалара хайаан да туолуо диэн эрэнэбит!

Елена ПОТОЦКАЯ, “Саха сирэ” хаһыат, edersaas.ru

 Хаартыскаҕа Игнатьевтар дьиэтээҕи архыыптарыттан.

#бүгүн: 1
19
1

Сайт матырыйаалларын ааптар көҥүлэ суох ылар бобуллар.


Notice: Undefined index: comment_notes_before in /var/www/edersaas/wp-includes/comment-template.php on line 2334

12 + 9 =