Ааспыт нэдиэлэҕэ саайтпытыгар “Нэдиэлэ Кэрэ Куота/ Эр Бэрдэ” диэн рубрика арыйбыппыт. Бүгүҥҥү ыалдьыппыт – Руслан Тараховскай.
Руслан Игоревич – Былатыан Ойуунускай аатынан Саха академическай тыйаатырын сүрүн режиссера. Кини 2002 сыллаахха М.С. Щепкин аатынан училищены тыйаатыр уонна киинэ артыыһа идэлээх бүтэрбитэ. Онтон 2006 сыллаахха Арктикатааҕы култуура уонна искусство институтугар режиссер идэтин баһылаабыта.
Эдэр киһи салалтатынан “Кэрэ көмүскэлигэр”, “Сэрии туһунан үс номох”, “Төлкө”, “Бүгүн эбэтэр хаһан да…”, “Ойуун түүлэ”, “Сыгый Кырынаастыыр” уо.д.а. испэктээктэр сыанаҕа турбуттара, үгүс көрөөччү биһирэбилин ылбыттара.
Дьоруойбут блиц-ыйытыкка эппиэттиир:
— Оҕо сылдьан туох идэлээх буолуоххун баҕарар этигиний?
— Лүөччүк буоларбын ыраланарым.
— Үгэстэри тутуһаҕын дуо?
— Киһи сиэринэн, баар үгэстэри барытын тутуһабын.
— Эн тускунан 100% билэр киһи баар дуо? Кимий?
— 100% бэйэбин даҕаны билбэппин дии саныыбын. Онон оннук киһи суох.
— Ханнык киинэни көрөргө сүбэлиигин?
— РСФСР норуодунай артыыһа, уһулуччулаах режиссер Андрей Тарковскай сэттэ киинэтин («Иваново детство», «Андрей Рублев», «Солярис», «Зеркало», «Сталкер», «Ностальгия», «Жертвоприношение») көрөргүтүгэр сүбэлиибин.
— Олоххор саамай өйдөөн хаалбыт түгэниҥ?
— Оскуолаҕа үөрэнэ киирбит күммүн өйдүүр эбиппин.
— Бу сиргэ саамай туохтан куттанаҕын?
— Сэрииттэн.
— Хайа дойдуга сынньана барыаҥ этэй?
— Төрөөбүт нэһилиэкпэр.
— Олоххо тутуһар санааҥ?
— “Эйиэхэ хайдах сыһыаннаһыахтарын баҕараҕын да, оннук эн эмиэ дьоҥҥо сыһыаннас” диэн этиинэн салайтарабын.
— Олоххор саамай соһуччу уонна толкуйдаабакка оҥорбут быһыыҥ?
— Бөппүрүөскэни боруобалаабытым.
edersaas.ru