Тастан оту тиэйии аны биир нэдиэлэнэн түмүктэниэ

Бөлөххө киир:

Муус устар 12 күнүнээҕи туругунан, улуустартан тыа хаһаайыстыбатын управлениелара ааҕан-суоттаан киллэрбиттэринэн, сүөһүгэ-сылгыга 141449 туонна аһылык хасааһа баар. Бу иһигэр сайын оттоммут оттон 131185 т (27,8%) ордубут, сиилэстэн 6090 т, сенажтан 800 т хаалбыт.

Былырыын баччаҕа 115494 т, ол эбэтэр оттоммут оттон 25,5 бырыһыана, баара. Онно тэҥнээтэххэ, быйыл балаһыанньа ордук курдук эрээри, сылгы эбии аһылыкка аһара эрдэ киирбитэ итиэннэ билигин 82140 (ааспыт сылга баччаҕа – 54 тыһ. этэ) сылгы ынахтыы аһыы турара охсон-сотон таһаарыан сөп. Онон быйылгы кыстык хайдах түмүктэнэрэ дьылбыт төһө уһууруттан улахан тутулуктаах буолуоҕа.

“Айылҕа күчүмэҕэйигэр түбэспит улуустар сайыҥҥыттан сайаапка хомуурун саҕалаабыттара. Ол түмүгүнэн министиэристибэҕэ 16 тыһ. кэриҥэ туонна оту тиэйиигэ сайаапка түмүллүбүтэ”, — диир сир үлэтигэр, мелиорацияҕа уонна материальнай-тэхиньиичэскэй хааччыйыыга департамент салайааччыта Василий Чичигинаров.  Бу күҥҥэ былааннаммыт кээмэйтэн 14286 т от (89%) тиэйилиннэ. Өрөспүүбүлүкэ иһиттэн 13205 т, өрөспүүбүлүкэ таһыттан – Магадан, Амур уобаластарыттан 1081 т от аҕалылынна (тастан атыылаһан тиэйии кээмэйэ: 1239 т от). Маны тэҥэ улуус иһигэр нэһилиэктэн нэһилиэккэ 351, улуустан улууска 1181 т от тиэйиллэрэ хаалла.

Василий Васильевич этэринэн, билигин тирээн турар сорук: Өлүөнэ, Алдан өрүстэринэн кыһыҥҥы суолу баттаһа хаалбыт кээмэйи ситэри тиэйии. Саамай уустуга — Магадан Сеймчаныттан аҕалыы. Анараа миэстэтигэр погрузчиктаах соҕотох тыраахтар үлэлиир буолан, күҥҥэ 3 массыынаҕа эрэ тиэйэн ыытар кыах баар эбит. Этэҥҥэ буоллаҕына, Магадантан Нам уонна Чурапчы улуустарыгар, оттон Амуртан Уус Алдаҥҥа  оту аҕалыы аны биир нэдиэлэнэн түмүктэниэ.

Оту тиэйиигэ сорох бөдөҥ хаһаайыстыбалар бэйэлэрин массыыналарын сүүрдэллэр. Хаҥалас улууһугар “Самартай” ТХПК чааһынай массыыналаахтары суббэдэрээккэ кэпсэтэн, үлэлэтэ сылдьар. Өрүү буоларын курдук, улахан кээмэйи “Туймаада-Агроснаб” АУо толорор: хампаанньа массыыналара Дьокуускайы, Нам, Уус Алдан, Чурапчы улуустарын хааччыйаллар. Тиэйии-таһыы ороскуотун толуйууга өрөспүүбүлүкэ бүддьүөтүттэн 66,8 мөл. солк. көрүллүбүтүттэн 28,8 мөлүйүөнэ тиксэриллибит. “Быйыл тиэйии өҥөтүгэр тэрилтэлэри кытта дуогабардаһарга,  уматык тарыыба 2012 сыллааҕынан турар буолан, уустуктары көрүстүбүт. Онон инникитин үрдэтиигэ үлэлэстэхпитинэ эрэ табыллыыһы”, — диир департамент салайааччыта.

Василий НИКИФОРОВ.

+1
0
+1
0
+1
0
+1
0
+1
0
+1
0
+1
0