РФ спордун үтүөлээх маастара, СӨ физическай култууратын, спордун үтүөлээх үлэһитэ, Мэҥэ Хаҥалас улууһун уонна Доллу нэһилиэгин бочуоттаах гражданина, биллиилээх быһый Татьяна Жиркова бүгүн төрөөбүт күнүн бэлиэтиир.
Кини Павловскай орто оскуолатыгар үөрэнэр сылларыгар учуутала Анатолий Никитич Осипов көмөтүнэн спорка бастакы хардыыларын оҥорбута. Өрөспүүбүлүкэтээҕи күрэхтэһиилэргэ уһун сылларга иннигэр кими да түһэрбэтэҕэ.
Кэлин Татьяна Жиркова уһун сиргэ сүүрүүнэн утумнаахтык дьарыктаммыта. Кини 2002 сыллаахха Торхаут куоракка (Бельгия) ыытыллыбыт уон көскө сырсыыга аан дойду чөмпүйэнээтигэр биэтэккэ бастакынан кэлбитэ. Ити ситиһиитин 2004 сыллаахха Винсхотеҥҥа (Голландия) буолбут аан дойду чөмпүйэнээтигэр Европа рекордун олохтоон (7:10.31) чиҥэппитэ. 2008 сыллаахха Этруска (Италия) ыытыллыбыт күрэхтэһиигэ бастаан, аан дойду үс төгүллээх чөмпүйүөнүнэн буолбута.
Кини бу дистанцияҕа Европа 2003 (Черноголовка, Арассыыйа), 2008 (Этруск, Италия) сыллаардааҕы чөмпүйүөнэ.
Саха быһый кыыһа Соҕуруу Африкаҕа буолар 89 биэрэстэҕэ сүүрүүгэ аатырбыт-сураҕырбыт «The Comrades» күрэхтэһии 2005 сыллааҕы кыайыылааҕа. Бу 95 сыл устата ыытыллар куоталаһыыга иккис бастыҥ көрдөрүүнү – 5 чаас 58 мүнүүтэ 50 сөкүүндэ – ситиһэн бэйэтин аатын аан дойду чэпчэки атлетикатын устуоруйатыгар суруйан хаалларбыта. Манна 2009 сыллаахха үһүс миэстэни ылан турар.
Татьяна Жиркова биир улахан ситиһиитинэн 2006 сыллаахха эмиэ Соҕуруу Африкаҕа буолар «Два океана» диэн 56 биэрэстэҕэ сүүрүүгэ кыһыл көмүс мэтээли ылыыта буолар. Кини Саха Өрөспүүбүлүкэтин 2000, 2004, 2006, 2008 сыллардааҕы чулуу спортсменынан билиниллибитэ.
Сверхмарафон норуоттар икки ардыларынааҕы ассоциацията (IAU) Татьяна Жирковаҕа уһун сиргэ сүүрүү устуоруйатыгар аан дойду соҕотох үс төгүллээх чөмпүйүөнүнэн буоларын туоһулуур сертифаты туттарбыта.
Саха сирин биир чулуу спортсменын аата «Лучшие люди России» кинигэҕэ киллэриллибитэ. Мэҥэ Хаҥалас улууһун Павловскай сэлиэнньэтигэр ыччат квартала Татьяна Жиркова аатын сүгэр.
2012 сыл балаҕан ыйыгар Татьяна Жиркова улахан спортан тохтообута. Билигин эдэр сүүрүүктэри эрчийэр. Уопуттаах тириэньэр иитиллээччилэрин ортотугар марафоҥҥа Арассыыйа чөмпүйүөнэ Сардаана Трофимова баар.
“Саха сирэ” хаһыат, edersaas.ru