Москва куорат Мещанскайдааҕы оройуонун мировой суута Куттал суох буолуутугар федеральнай сулууспаҕа информация биэрэртэн батыммытын иһин Telegram Messenger LLP (Лондон) хампаанньаҕа 800 тыһыынча солкуобайдаах ыстараап түһэрдэ. Бу туһунан РИА Новости иһитиннэрэр.
Telegram төрүттээччитэ Павел Дуров Куттал суох буолуутугар федеральнай сулууспа өссө балаҕан ыйыгар “Яровая сокуоннарын” тутуспатаҕын иһин мессенджергэ боротокуол толорбутун туһунан этэн турар. Бу иннинэ кини хампаанньатыгар кыһарыйыы оҥорор дойдуларга бизнеһин сабарга бэлэмин туһунан иһитиннэрбитэ.
Бэрэсидьиэн сүбэһитэ Герман Клименко Дуров кэлин тиһэҕэр син биир былаастары кытта бииргэ үлэлэһиэҕин, биитэр Telegram сабыллыаҕын ыйда. Клименко эппитинэн, аан дойдуга биир да судаарыстыба бэйэтин сиригэр-уотугар биллибэт дьон информацияны тарҕаталларын тулуйуо суоҕа үһү.
Терроризмы утарар сокуоннарга олоҕуран, сибээс оператордара итиэннэ интернет-хампаанньалар бары кэпсэтиилэри, суруйсуулары, ол иһигэр видеоны, хаартысканы, сыл аҥара кэм устата харайар уонна олору ыйытыгынан анал сулууспаларга биэрэр эбээһинэстээхтэр.
Роман Попов, “Саха сирэ” хаһыат, edersaas.ru