Маныахаҕа диэри туох да аньыыга-хараҕа киирбэтэх киһи быстах санааҕа оҕустаран, уорар түбэлтэтэ баар буолааччы. Холобура, улахан маркет-маҕаһыыҥҥа быычыкаайык биэнсийэ сыыстаах эмээхсин биир халбаһыыны дуу, килиэби дуу ылбытын курдук дьыалалар.
Соторутааҕыта Хаҥалас улууһугар итиниэхэ маарынныыр уоруу тахсыбыт.
Ол курдук, бу улуус полициятыгар бэчээт тэрилтэтин салайааччыта эрийэн, кини үлэтигэр баар сейфэтиттэн 20 тыһ. солк. харчытын уорбуттарын туһунан иһитиннэрбит. Уоруу тахсыбытын, дьахтар уоппускатыгар сылдьар эрээри, суһал сакааһы толороору, үлэтигэр кэлэн билбит.
Быһылаан сиригэр тиийбит суһал-силиэстийэлиир бөлөх кабинет аана алдьамматаҕын, ол аата харчыны тэрилтэ бэйэтин үлэһиттэриттэн ким эрэ ылбыт буолуон сөбүн быһаарбыт.
Онон, бу уоруу бэрт судургутук арыллыбыт диэххэ сөп — салайааччы кабинетын күлүүһэ бэйэтигэр эрэ буолбакка, кинини солбуйа хаалбыт дьахтарга эмиэ баар эбит.
Уорбаланааччы 53 саастаах дьахтар бастакы доппуруостааһыҥҥа билиммитинэн, салайааччытын хоһугар докумуоннары ыла киирбит. Онно остуол дьааһыгар сейфэ күлүүһэ сытарын ылан, сейфэни аһан, харчы сытарын көрбүт.
Ол харчыны ылан, кирэдьиитин төлөөбүт. Ылбыт харчытын сууматын, хотуна уоппускаҕа сылдьар кэмигэр, аҕалан төттөрү ууруох курдук санаабыт. Онуоха баара, «өлүү түбэлтэлээх», салайааччыта соһуччу тиийэн кэлбит.
Бу чахчынан «уоруу» ыстатыйанан холуобунай дьыала тэриллибитин туһунан СӨ ИДьМ-тын пресс-сулууспата иһитиннэрдэ.
Вера Макарова, «Саха сирэ» хаһыат, edersaas.ru
Хаартыска: интэриниэттэн.