СӨ Бырабыыталыстыбатын бэрэссэдээтэлин бастакы солбуйааччы Алексей Колодезников тырааныспар ситимин сүрүннүөҕэ. Кини авиация эйгэтигэр улахан үлэ күүтэрин эттэ. Бастатан туран, «Якутия» уонна «Полярнай авиалиния» авиахампаанньалар бигэ туруктаах, тиһигин быспат үлэлээх буолалларын хааччыйарга сыал-сорук турар.
edersaas.ru
Өрөспүүбүлүкэ аэропуортарын ситимин саҥардыы, өрөмүөннээһин үлэтэ күргүөмнээхтик барыаҕа. Дьокуускай аэропуордугар сөмөлүөттэр түһэр-көтөр балаһаларын өрөмүөнүн бастакы уочарата быйыл саҕаланан, 2020 с. түмүктэниэҕэ.
«Өлүөхүмэ, Нерюнгри, Мииринэй аэропуортарын саҥардыахпыт, сотору кэминэн Дьокуускайтан омук сиригэр көтөр терминалы саҥардыы үлэтэ саҕаланыаҕа», — диэн эттэ Алексей Колодезников.
«Якутия» уонна «Полярнай авиалиния» авиахампаанньалары холбоон, биир холдинг тэрийэр туһунан сурах олоҕо суоҕа бэлиэтэннэ. Күн бүгүн «Якутия» авиахампаанньа үгүс-үтүмэн иэһэ мунньуллан турар, ол иһигэр, Дьокуускай аэропуордугар 200 мөл. солк. иэстээх. Аан бастаан «Якутия» авиахампаанньа үп-харчы өттүнэн бигэ туруктаах буоларын хааччыйар наадалааҕын кини санатта. Ол эрэ кэнниттэн, баҕар, икки тэрилтэни холбооһун боппуруоһа көрүллүөн сөп.
Марианна Тыртыкова, «Саха сирэ», edersaas.ru