Дьокуускай куоракка терроризмы өйүүр киһини билэр эрээри, ол туһунан боломуочуйалаах уорганнарга биллэрбэтэх 25 саастаах гражданин сууттанна.
Бу эдэр киһи дьыалата РФ Холуобунай кодексатын 205.6-с ыстатыйатынан тэриллэн, силиэстийэлэнэн бүтэн, суут мунньаҕар көрүллүбүт.
Суут быһаарбытынан, бу киһи Дьокуускай куоракка олорон, 2017 сыл кулун тутар 1 күнүттэн 2017 сыл муус устар 12 күнүгэр диэри кэм иһигэр билэр киһитэ радикальнай исламы өйүүр интэриниэт-бөлөхтөргө кэпсэтэрин-суруйсарын көрбүт, истибит. Ол эбэтэр, терроризмы аһаҕастык өйүүрүн билбит.
Оттон итинник дьайыылар иһин холуобунай эппиэтинэс көрүллэр. Ону бу киһи билэр эрээри, былаас уорганнарга тыллаабатах.
Манна бэлиэтээн эттэххэ, өскөтүн киһи чугас аймаҕа, кэргэнэ итинник дьайыылары оҥорорун уорганнарга биллэрбэтэҕинэ, холуобунай эппиэккэ тардыллыбат.
Суут бу эдэр киһини 25 тыһ. солк. суумалаах ыстараап төлүүргэ уурда.
Оттон интэриниэккэ терроризмы өйүүргэ ыҥырбыт омук киһитигэр холуобунай дьыала тэриллэн силиэстийэлэнэр.
Бу туһунан Дьокуускай куорат борокуратуурата иһитиннэрдэ.
Биһиги корр., «Саха сирэ» хаһыат, edersaas.ru
Хаартыска: интэриниэттэн.