Бырабыыталыстыба бу нэдиэлэтээҕи мунньаҕынан, өрөспүүбүлүкэбитигэр иккис кыбаарталга тиийинэн олоруу алын кээмэйэ 16603 солк. быһылынна.
Бастакы кыбаарталга бу сыыппара өрөспүүбүлүкэбитигэр ортотунан 16443 солк. этэ. Үлэһит дьоҥҥо — 17388, биэнсийэлээхтэргэ — 13173 , оҕолорго — 17005 солк. тэҥнэспитэ.
Оттон билиҥҥи туругунан, бу кээмэй үлэһиттэргэ – 17601, биэнсийэлээхтэргэ – 13335, оҕолорго – 17023 солкуобай буолла.
Санатан эттэххэ, тиийинэн олоруу алын кээмэйэ Судаарыстыбаннай статистика аска-үөлгэ сыана тахсыытын кэтээн көрүүтүгэр олоҕурар. Статистика көрдөрөрүнэн, өрөспүүбүлүкэбитигэр бастакы кыбаарталы кытары тэҥнээтэххэ, ас-үөл сыаната 1,1 % үрдээн, биир киһиэхэ ортотунан 7371 солк. тэҥнэспит. Саамай үрдүк сыана 9759 солк. Зырянкаҕа бэлиэтэммит. Оттон Нерюнгрига ас-үөл сыаната чэпчэки. Манна биир киһи аһыыр аһылыгын бородууктатын корзината ортотунан 6413 солк. тэҥнэспит.
Аграфена КУЗЬМИНА, “Саха сирэ” хаһыат, edersaas.ru