Батсаап ситимигэр күн аайы туох эрэ киһи интэриэһин тардар биир уопсай сонун баар буолар. edresaas.ru
Бүгүҥҥү күҥҥэ оннук сонунунан Хаҥалас улууһун Тиит Арыытыгар Японияттан сылдьар комик африканец артыыстар киинэҕэ уһуллуулара буолла. Мин бу туһунан Тиит Арыы дьахталларын сэбиэтин бэрэссэдээтэлэ, нэһилиэк бэрэстэбиитэллээх уорганын дьокутаата Маргарита Кузьминаны кытта кэпсэттим.
— 15 киһилээх бөлөх Тиит Арыыга биһигини, дьахтар сэбиэтин, анаан ааттаан кэлбиттэрэ. Японияҕа олорон үлэлиир аатырбыт комик артыыстар саха ыалын күннээҕи олоҕун «олорон», бэйэлэрин тустаах оруолларыгар оонньоотулар. Ол курдук, Тумул нэһилиэгэр тиийэн, дьону кытта муус аннынан балыктаан, саха аһылыгын астаан аһаан, хотоҥҥо сылдьан, өрүстэн муус таһааран, баанньыкка суунан, быһата, күннээҕи олохпутун уһуллулар. Остуол хотойорунан сахалыы ас дэлэйиттэн сөхтүлэр. Тымныы аспыт — кыһыллыбыт тоҥ балык, эт, күөрчэх минньигэһин амсайдылар. Таҥас сууйан баран, таһырдьа куурдубуттара, хаччаччы тоҥон хаалбытын көрөн, оҕолуу үөрдүлэр. Бу, арааһа, телесериал быһылаах. Хаарбыт ырааһыттан соһуйаллар. Хаар диэни көрбөтөх дьоҥҥо ураты дьикти быһылаах. Айылҕабыт кэрэтиттэн сөҕүү-махтайыы бөҕө.
Япония артыыстарын Москваттан продюсер уонаа тылбаачсчыт арыаллыы сылдьаллар. Кинилэргэ уонна дьоппуон операторыгар икки саха ыччата устан көмөлөһө сылдьаллар, — диэн Маргарита Владимировна кэпсээтэ.
Биллэн турар, бары өҥөлөргө омук туристара төлөбүрүн оҥорбуттар. Онон Саха сирин улуустарын нэһилиэктэригэр араас ис хоһоонноох аан дойдутааҕы таһымнаах киинэ уһуллуутугар өйөбүл оҥоруутун курдук туризм биир көрүҥэ эмиэ сайдан эрэр. Оттон хайа да сыллааҕар быйыл омуктар Саха сиригэр кэлиилэрин сүрүн төрүөтүнэн, биллэн турар, тымныыбыт буоллаҕа. Аан дойду бары иһитиннэрэр-биллэрэр сириэстибэлэрэ Саха сирин, чуолаан Өймөкөөн тымныытын туһунан кэпсиэхтэриттэн ыла, күн бүгүҥҥэ диэри хаары уонна тымныыны баттаһа, араас соруктаах турист субулла турар.
Елена ПОТОЦКАЯ, «Саха сирэ» хаһыат, edersaas.ru
Хаартыска — батсаап ситимиттэн.