Бүгүн сэтинньи 7 күнүгэр Булуҥ улууһун Тиксии бөһүөлэгэр 300 кВтВ кыамталаах үс оборудование үөрүүлээх арыллыыта буолла. Тыал күүһүнэн эниэргийэни хачайдыыр ыстаансыйаны өрөспүүбүлүкэ бырабыыталыстыбата «РусГидро» уонна дьоппуон Komaihaltec Inc хампаанньатын кытта энергетическэй уонна бырамыысыланнай технологияны сайыннарыы чэрчитинэн тутан олоххо киллэрдилэр.
edersaas.ru
Тыал пааркатын үөрүүлээх арыллыытыгар видеокэмпириэнсийэҕэ Ил Дархан Айсен Николаев, СӨ Бырабыыталыстыбатын бэрэссэдээтэлин бастакы солбуйааччы Алексей Колодезников, Хабаровскай куоракка баар Япония генеральнай консула Масанори Фукусима, «РусГидро» генеральнай дириэктэрэ Николай Шульгинов, NEDO дьоппуон хампаанньатын толорооччу дириэктэрэ Такси Омотэ, «Комаихалтек» вице-бэрэсидьиэнэ Эми Комаи уонна «Якутскэнерго» генеральнай дириэктэрэ Александр Слоик кытыннылар.
«РусГидро» уонна дьоппуон хампаанньатын күүһүнэн кылгас кэм иһигэр тыал пааркатын тутан, хотугу эргимтэ нөҥүө аан дойдуга саамай тыйыс усулуобуйаҕа олорор дьон олоҕун тупсарыыга дьоһун хардыы оҥоһулунна. Тыал күүһүнэн үлэлиир дизельнэй энергетика Арктика атын оройуоннарыгар эмиэ туттуллуон сөп», — диэн эттэ Айсен Николаев.
Инникитин дьоппуоннары кытта бөҕү переработкалыырга, тыа хаһаайыстыбатын бородууксуйатын, ойуурга үүнэр отону астыырга, икки өттүттэн туризмы сайыннарыыга бииргэ үлэлэһиэххэ сөбүн бэлиэтээтэ.
«РусГидро» генеральнай дириэктэрэ Николай Шульгинов Саха сиригэр тыал күүһүнэн уоту хачайдыыр ыстаансыйа үчүгэйдик үлэлээтэҕинэ, сыаналаах дизельнэй оттугу тиэйиигэ ороскуот кыччыан сөбүн ыйда. Өскөтүн Тиксиигэ бу бырайыак табылыннаҕына, уопуту Уһук Илин кытыы оройуоннарыгар эмиэ туһаныахтара.
«Полярнай энергетическэй микроситим» бырайыагын үбүлээбит, технологиятын туппут дьоппуон хампаанньата Саха сирин Арктикатын тымныы тыйыс усулуобуйатыгар тургутуллубут бачыымы Арассыыйаҕа уонна тас дойдуларга атыылыыр санаалаах.
Марианна Тыртыкова, «Саха сирэ», edersaas.ru