«Тимир Көлө-2017»: Булгунньахтаахха тырахтарыыстар күрэхтэстилэр (ВИДЕО)
Чурапчытааҕы “Күүстээх Көлө” кэннэ, аны Хаҥалас улууһун Булгунньахтааҕа “Тимир Көлө” диэн бөлөрүүс тыраахтардар күрэхтэһиилэрин чөкөтүк, олус тэрээһиннээхтик ыытта.
Прокопий БУБЯКИН, https://edersaas.ru
“Тимир Көлө” уратыта диэн, тэрийээччилэр нэһилиэк тырахтарыыстарыгар эрэ кыттар быраабы биэрдилэр. Бу күрэхтэһиини нэһилиэк эр дьонун түмсүүтэ уонна олохтоох дьаһалта тэрийэн, иилээн-саҕалаан ыыттылар. Ыһыылаах-хаһыылаах, ыалдьыылаах күрэхтэһиигэ олохтоох киһи Леонид Наумов кыайда. Олохтоохтор олус астынан дуоһуйа сынньанан бардылар.
Кыайыылаахтар
1 миэстэ Леонид Наумов
2 миэстэ Олег Исаков
3 миэстэ Иннокентий Стручков
Түһүмэхтэр
- Теория. Суол быраабылатын билиигэ тест толоруу
- Маастарыстыбаны көрдөрүү.
— Дьыалабыай маһы икки чууркаҕа ууруу
— Турба дьөлөҕөһүгэр тимир угуу
- 3. Практическай чаас
— Бырысыабы холбонон “гаражтан” таһаарыы, “змейканан” айаннааһын, онтон төттөрү “гаража” киллэрии
— 500 миэтэрэҕэ сүүрдэн куоталаһыы.
Баһылык санаата
Денис Уваров, Булгунньахтаах нэһилиэгин баһылыга:
- Уопсайа 8 тырахтарыыс кытынна. Быйыл нэһилиэк таһымыгар буолла, эһиил аһаҕас гынан, атыттары эмиэ кытыннарыахпыт диэн былааныыбыт. Тэрээһин уопсай сыала-соруга — тыа сиригэр ыччаты техникаҕа, үлэҕэ, идэҕэ сыһыарыы уонна көҕүлээһин. Тырахтарыыс идэтин престиһин үрдэтии. Кинилэр нэһилиэккэ билигин сүрүн дьон. Ону таһынан өр сылларга үлэлээбит билигин да үлэлии сылдьар тырахтарыыстарга болҕомтону ууруу, ытыктааһын, чиэстээһин. Мин саныахпар, өрөспүүбүлүкэ атын нэһилиэктэр олохтоохторо болҕомтолорун ууран, маннык күрэхтэһиилэри көҕөлүү, тэрийэ тураллара наада. Тыа сирин ыарахан, хара үлэтигэр сылдьар дьону — тырахтарыыстары өйдөөн, өйөөн.
Прокопий БУБЯКИН, https://edersaas.ru
Дьокуускай — Булгунньахтаах.