ХИФУ “Сэргэлээх уоттара” Култуура киинигэр бэҕэһээ Иван Монастырев — Тирэх Уйбаан “Айыллыбыт аналым” диэн быыстапката арылынна. Быыстапканы көҕүлээн тэрийбит, ХИФУ үлэһитэ Александр Герасимов бу Орто туруу бараан дойдуга киһи талаана-дьоҕура араастаан тахсарын, ким эрэ уус, ким эрэ эмчит, ким эрэ уран тыллаах суруксут быһыытынан арылларын, оттон Тирэх Уйбаан бу хаачыстыбалары үһүөннэрин илдьэ сылдьарын туһунан эттэ.
Ол курдук, маһы хаамтарбат эрэ уус, эмэгэттээх эмчит уонна этиттэриилээх хоһоонньут буоларын бэлиэтээн туран, бу быыстапкаҕа кини талаанын биир өрүтүн, уус быһыытынан, билсэрбитин эттэ.
Покровскай куорат дьаһалтатын баһылыга Петр Гермогенов эҕэрдэтин “Уйбаан Уйбаанабыс мин аҕам үөлээннээҕэ, бэйэм убайым курдук саныыр, мэлдьи сүбэлэтэ-амалата сылдьар киһим” диэн тылларынан саҕалаата итиэннэ Тирэх Уйбаан Хаҥалас улууһун духуобунай олоҕор улахан сабыдыалы оҥорорун, сахалыы өйү-санааны иҥэрэргэ, куту-сүрү бөҕөргөтөргө үлэлиирин кэпсээтэ. “Сэргэлээх уоттара” Култуура киинин дириэктэрэ Светлана Рафаиловна сүүрбэччэ сыллааҕыта Покровскайдааҕы “Саргы түһүлгэтигэр” Тирэх Уйбааны кытары бииргэ үлэлээбит сылларын истиҥник аҕынна, “Айыллыбыт аналым” быыстапка кини айар үлэтин дьоҥҥо-сэргэҕэ, ордук эдэрдэргэ билиһиннэрэр сыалтан, күннэтэ тыһыынча кэриҥэ киһи сылдьар түһүлгэтигэр, “Сэргэлээх уоттарыгар”, тэриллэрин тоһоҕолоон бэлиэтээтэ, Уйбаан Уйбаанабыска айар үлэтигэр өссө үрдүк ситиһиилэри баҕарда.
— Эһиги өйгүтүнэн көмүскэниэхтээххит, санааҕытынан харыстаныахтааххыт, ол иһин өйү-санааны таба туттуохтааххыт, — диэтэ Тирэх Уйбаан уонна быыстапкаҕа кэлбит дьону сэлэлии туруоран, Айыы тыынын иҥэрдэ. Онтон сааланы кэрийэ хааман, хас биирдии оҥоһугун хаһан, хайдах оҥорбутун туһунан сэһэргээтэ.
Георгий Родионов, ССРС художниктарын сойууһун чилиэнэ, Арассыыйа үтүөлээх художнига, Саха норуодунай художнига, Саха Өрөспүүбүлүкэтин искусствотын үтүөлээх үлэһитэ, ХИФУ доцена:
— Иван Иванович биһикки эдэр эрдэхпититтэн билсэбит, иккиэн Чурапчыттан төрүттээх биир дойдулаахтарбыт, тус-туһунан сылларга да буоллар, Дьокуускайдааҕы художественнай училищены бүтэрбиппит. Кини айар үлэтин өр сылтан кэтээн көрөбүн уонна муоска да, маска да даҕаны дэгиттэр уус быһыытынан үрдүктүк сыаналыыбын. Мас ис тутулун таба туһанан, бүтүн дууһатын ууран ойуулууругар эбии ураты айдарыылаах буолан, кини чочуйан оҥорбут үлэлэрэ Айыы тыынынан сыдьаайаллар, алгыстаахтар. “Тирэх оҥоһуктара араҥаччылыыр, эмтиир дьикти күүстээхтэр” диэн дьон мээнэҕэ эппэт. Онон маннык үлэлэри үйэтитэргэ уонна бар дьон көрдөрүүтүгэр таһаарарга туспа мусуой тэриллэрэ наада дии саныыбын. Күндү доҕоттор, бачча тосхойбут үтүө түгэни мүччү тутумаҥ, “Сэргэлээх уоттара” Култуура киинигэр кэлэҥҥит Тирэх Уйбаан айар быыстапкатын көрүҥ. Оттон ахсынньы 7 күнүгэр бэйэтин кытары атах тэпсэн олорон сэһэргэһиҥ, айылҕаны анаарыытын, эйгэни ырытыытын истиҥ, сэргэҕэлээҥ!
Раиса СИБИРЯКОВА, «Саха сирэ» хаһыат, edersaas.ru