Бу күннэргэ Сунтаар Тойбохойугар ыытыллыбыт «МЭР» дьыалабыай оонньууга улуус эдэр исписэлиистэрэ көхтөөхтүк кытыннылар. Тэрээһиҥҥэ барыта 10 хамаанда кыттыбытын туһунан улуус дьаһалтатын баһылыгын көмөлөһөөччүтэ Тимур Иванов «Эдэр саас» сайтка кэпсээтэ.
Анивера Акимова, «Саха сирэ» хаһыат, https://edersaas.ru/
Быйылгы дьыалабыай оонньуу Ыччат сылыгар анаммыт. Күндэйэттэн «Үрдэл», Тойбохойтон «Ньургуһуннар», Элгээйиттэн «Хардыы», Бүлүүчээнтэн «Дамы в красном», Уһун Күөлтэн «Энерджайджер», Күүкэйтэн «Сарыал», Кириэстээхтэн «Тосхол», Дьаархантан «Олох эрэлэ», Устьеттан «Куб», Сунтаартан «Сайдыс» хамаандалар кытыннылар.
– Хамаандалар киэһээ биэс чааска диэри бэриллибит тиэмэлэринэн бырайыак оҥорон бэлэмнээн баран, дьүүллүүр сүбэ иннигэр көмүскээтилэр. Дьүүллүүр сүбэҕэ Сунтаар улууһун баһылыга Анатолий Григорьев, кини бастакы солбуйааччыта Николай Александров, үпкэ-экэниэмикэҕэ солбуйааччы Максим Прокопьев, социальнай-имиджевой бэлиитикэҕэ солбуйааччы Ульяна Попова, ыччат бэлиитикэтин салаатын начаалынньыга Евгений Данилов, тыа хаһаайыстыбатын управлениятын начаалынньыга Иван Тихонов, экология иниспиэксийэтин салайааччыта Сергей Николаев, «Центр бизнес» МАУ дириэктэрэ Мария Саввинова бааллар этэ. Онон, бырайыактар дьоһун хамыыһыйаны аастылар. Күрэх түмүгүнэн, Бүлүүчээн хамаандата “Тойон хотуур” бырайыагынан эрэллээхтик бастакы миэстэҕэ таҕыста. Ол курдук бу бырайыак социальнай суолталаах. Нэһилиэк ыччата кыаммат араҥаҕа буор-босхо отторун бэлэмнээн биэриэхтэрэ. Уһун Күөл “Сынньанар сир” бырайыага улахан сэҥээриини ылан, иккис бочуоттаах миэстэҕэ тигистэ. Кириэстээхтэр «Сила добра» үлэлэрин хамыыһыйа эмиэ үрдүктүк сыаналаан, үһүс миэстэни ылла. Баһылык Анатолий Григорьев кыайбыт хамаандалары эҕэрдэлээтэ уонна миэстэҕэ тиксибэтэх хамаандалары ис дууһатыттан алҕаан туран, санааларын түһэрбэккэ, иннилэрин диэки эрэллээхтик баран иһэллэригэр эттэ, – диэн Тимур Иванов оонньуу туһунан сиһилии кэпсээтэ.
Сунтаарга «МЭР» дьыалабыай оонньуу номнуо иккис төгүл ыытыллан, нэһилиэктэр туруорбут хамаандалара күөн күрэстэстилэр. Бастакы оонньуу тутула арыый даҕаны атын этэ. Быйыл көмүскээбит бырайыактарын олоххо киллэрэргэ үлэлэһиэхтэрэ.
Анивера Акимова, «Саха сирэ» хаһыат, https://edersaas.ru/