Мас тардыһыыга аан дойдутааҕы федерация бэрэсидьиэнэ Александр Акимов бирииһигэр Европа муҥутуур чөмпүйүөнүн быһаарар күрэхтэһии Сербия Прогар куоратыгар бэс ыйын 10-гар, Ыһыах бырааһынньыгын иитинэн ыытыллар.
Роман Попов, “Саха сирэ” хаһыат, https://edersaas.ru
Спорт национальнай көрүҥнэригэр өрөспүүбүлүкэтээҕи киин мас тардыһыытын сайыннарыыга салаатын исписэлииһэ Арнольд Мохов иһитиннэрбитинэн, бүгүҥҥү күҥҥэ Арассыыйа, Сербия, Литва, Венгрия, Хорватия, Словакия мадьынылара чөмпүйэнээккэ кытталларын бигэргэппиттэр, өссө хас да судаарыстыба спортсменнара кэлэллэрэ күүтүллэр.
Арассыыйа аатыттан Саха сирин муҥутуур кыайыылааҕа Сергей Фролкин уонна аан дойду Кубогын бастакы түһүмэҕин 125 киилэҕэ диэри ыйааһыҥҥа призера Андрей Маркин (Свердловскай уобалас) кытталлара быһаарылынна.
Сергей Фролкин билигин Виктор Докалов салалтатынан эрчиллэр. Соторутааҕыта кини дойду чөмпүйүөнүнэн уонна аан дойду Кубогын бастакы түһүмэҕин кыайыылааҕынан буолбута. Саха сирин күүстээх мадьыныта от ыйыгар Үөһээ Бүлүүгэ буолар Манчаары оонньууларыгар кыттар санаалаах.
Роман Попов, “Саха сирэ” хаһыат, https://edersaas.ru