ТОП-6 «Азия оҕолоро» оонньуу түгэннэрэ

Ааптар: Эдэр Саас

Бөлөххө киир:

«Азия оҕолоро» оонньуу Саха сиригэр сайдыыттан атыны аҕалбатылар. Быйылгы тэрээһини өрөспүүбүлүкэ бүтүннүү биир киһи курдук күүппүтэ. Оҕолор уон күн устата 22 спорт араас көрүҥүнэн күрэхтэстилэр. Маны таһынан араас культурнай тэрээһиннэр буоллулар. Саха сиригэр аны 2024 сыллаахха эргиллэн кэлэр спорт чаҕылхай бырааһынньыгын саамай чаҕылхай түгэннэрин таҥныбыт.

Уоттаах Эллэй. Сайсары күөлгэ «Азия оҕолоро» арыллыытыгар оонньуу уотун саха норуотун өбүгэтэ Эллэй уматта. Кини сахалыыга майгыннаабат оһуордаах көстүүмэ дьону соһутта. Маны Ил Дархан сүбэһитэ, «Азия оҕолоро» культурнай чааһын салайааччы Андрей Борисов: «Биһиги соҕурууттан төрүттээхпит. Бу көстүүм ону кэрэһэлиир, итиэннэ бэйэбит төрүт үгэспитин эмиэ көрдөрөр», — диэн быһаарар.
Дмитрий Медведев. Дойду вице-премьера Дмитрий Медведев Саха сиригэр бүтэһигин Аллараа Бэстээххэ тимир суол кэлбитигэр сылдьыбыта. Кини оччолорго бэрисидьиэн этэ. «Азия оҕолоро» оонньууну быйыл кини үөрүүлээхтик арыйда. «Оонньуу олимпиада идиэйэлэрин тарҕатарга, утумнуурга саамай сөптөөх былаһаакка», — диэбитэ.
Волонтердар. Быйылгы оонньууга хаһааҥҥытааҕар даҕаны элбэх волонтер үлэлээтэ – 2000 киһи. Волонтердар Саха сирин 23 оройуонуттан, Татарстантан, Норвегияттан уонна Туркменистантан кэллилэр. Норвегияттан Джонни Бас 2012 сыллааҕы оонньууларга эмиэ үлэлээбитэ. «Саха культуратын олус сөбүлээтим, өссө даҕаны кэлиэм», — диир кини.
Июлина. Арина Данилова. «Бурито» бөлөх. Арассыыйаҕа биллэр биир дойдулаах ырыаһыттарбыт «Голос.Дети» куонкурус кыттыылааҕа Арина Данилова, «Главная сцена» барайыак кыттыылааҕа Июлина Попова уонна «Бурито» бөлөх кэнсиэртээн сэргэхситтилэр.
Lone сатамматах кэнсиэрэ. Дьокуускайтан төрүттээх аатырбыт рэпер, 2000 сыллааҕы «Азия оҕолоро» оонньуу баскетболга чемпионнаабыт хамаандатын хапытаана Lone – Леван Горозия Комсомольскай болуоссакка босхо кэнсиэртээтэ. Онно аһары элбэх (20 000 кэриҥэ киһи) көрөөччү мустан, анньыалаһан, сатаан көрбөккө, кэнсиэрт тохтотулунна.
Үҥкүүһүт полицейскай. Оонньуу арыллыытыгар «Туймаада» стадиоҥҥа патрульга турбут полиция үлэһитэ эмискэ артыыстары кытта тэбис-тэҥҥэ үҥкүүлээн тэйиэккэлээн, сальтолаан көрөөөччүлэри соһутта. Бу сценарий быһыытынан киирбит «фишка» эбит. Үҥкүүһүт Михаил Степанов полиция таҥаһыт кэппит.

Надежда САМСОНОВА.