Күөх харахтаах бааһынай көрүҥнээх, ол эрээри сахалыы ыраастык саҥарар Александр Иванов Саха сирин бастыҥ ыччатыттан биирдэстэрэ. Кини 1980 с. Дьаархаҥҥа төрөөбүт. Санкт-Петербурдааҕы тас экэнэмиичэскэй сибээс, экэниэмикэ уонна быраап институтун бүтэрбитэ. Дьаархаҥҥа баһылыгынан үлэлээбитэ. Онтон былырыыҥҥы быыбарга эрэллээхтик кыайан, Ньурба куорат баһылыга буолбута.
Коля — Саха сирин инники күөҥҥэ сылдьар многоборецтарыттан биирдэстэрэ, “Боотур” спортивнай кулуупка Уйбаан Белолюбскай салалтатынан дьарыктанар. Үөһээ Бүлүүгэ буолбут “Манчаары оонньууларын” чөмпүйүөнэ. “Алмаасэргиэнбааҥҥа” үлэлиир, үҥкүүлүүрүн сөбүлүүр.
Арыйаан ырыаһыт быһыытынан “Сүрэхпэр доҕотторум бука бары” киинэ кэнниттэн биллибитэ, онтон “Саҥа ырыа” бырайыакка ситиһиилээхтик кыттыбыта. Кэлиҥҥи кэмҥэ урукку ырыалары саҥардан ыллаабытын дьон биһирээтэ. Арыйаан Чурапчытааҕы физкултуура уонна спорт институтун бүтэрбитэ, тустуунан дьарыктанар, спорт эйгэтигэр үлэлиир.
2014 сыллаахха Артур, Дьокуускайдааҕы кадеттар оскуолаларын историяҕа уонна обществознаниеҕа учуутала, Саха өрөспүүбүлүкэтин бастыҥ учууталынан ааттаммыта. 2015 сыллаахха бүтүн Арассыыйатааҕы “Сыл бастыҥ учуутала” куонкуруска Саха сирин аатын көмүскээбитэ.
Вячеслав 2013 сыллаахха Арктикатааҕы култуура уонна искусство институтун бүтэриэҕиттэн Саха тыйаатырыгар үлэлиир. “Сайсары күөлгэ” киинэҕэ сүрүн дьоруойу толорон, дьон-сэргэ кинини билэрэ өссө улааппыта. Инстаграмыттан сылыктаатахха, Слава бултуурун, массыына ыытарын олус сөбүлүүр эбит.
Владислав учуутал буолар баҕалаах эбит, телевидение эйгэтигэр “алҕаска” кэлбит киһибин диэн интервьюга кэпсии сылдьбыта. Кини Мэҥэ Хаҥалас Табаҕатыттан төрүттээх, саха норуотун киэн туттар ырыаһыта Эдьиий Марыына сиэн быраатынан буолар.
Рустам Каженкин оскуола саҕаттан айар тыл абылаҥар ылларан, устудьуоннуур сылларыгар ону чочуйан, сайыннаран, билигин хас даҕаны хоһоон хомуурунньугун ааптара. Үөһээ Дьааҥы Адыаччы нэһилиэгитэн төрүттээх. “Айыы кыһата” оскуола дириэктэрин солбуйааччы, www.sakhatyla.com диэн саха тылын уонна литературатын учууталларыгар, интэриэстээх төрөппүттэргэ, оҕолорго аналаах сайт-бырайыак ааптара.
Захар Никитин колледжы 2012 сылтан салайар. Үөрэх кыһатын ситиһиитэ үгүс. 2016 сыл түмүгүнэн колледж “Образовательная организация ХХI века. ЛИГА ЛИДЕРОВ-2016” Бүтүн Арассыыйатааҕы куонкуруска лауреат үрдүк аатын ылбыта, Захар Николаевич салайар үөрэҕин кыһатын дьоһуннаах үлэтин туһунан үгүһү этэр.
P.S. Топка киирбит дьону ыйытык нөҥүө быһаардыбыт.
Динара Евсикова, edersaas.ru