“Туймаада” хампаанньа саҥа салайааччыта хаһаайыстыбалары бииргэ түмсэн-кыттыһан үлэлииргэ ыҥырда
Соторутааҕыта “Туймаада” үп-агропромышленнай хампаанньа АУо генеральнай дириэктэринэн анаммыт Петр Ефремов өрөспүүбүлүкэ тэриллиилээх улахан хаһаайыстыбаларын салайааччыларын, исписэлиистэрин кытта көрсөн, инникитин хайдах быһыылаахтык бииргэ үлэлиэхтээхтэрин кылгастык билиһиннэрдэ.
-Стратегия оҥостон, бииргэ үлэлиэхпит, — диир Петр Семенович. – Астыыр-үөллүүр салаа буоллун, кэпэрээссийэ буоллун – биир схеманан барыахпыт. Биһиги тэрилтэбит агрохолдинг буолуохтаах. “Туймаада” хампаанньа иһинэн АПК-ы өйүүр фонда тэриллиэҕэ, онно 2019-2021 сылларга төһө үп киириэн билигин чопчу этэргэ күчүмэҕэй. Кэпэрээссийэлэһэн үлэлээһин хайысхатын күүскэ тутуһуохпут. Улуустардааҕы астыыр-үөллүүр тэрилтэлэр ордор бородууксуйаларын “СахаАгроПродукт” өрөспүүбүлүкэтээҕи кэпэрэтиипкэ туттарыахтарын наада. Батарыыга биир сыана олохтонуо. Бары биир дьиэ кэргэн курдук түмсэн-кыттыһан үлэлиэҕиҥ диэн эһигини ыҥырабын.
Көрсүһүүгэ хампаанньаҕа иэстээх сылдьар кэпэрэтииптэр, ХЭУо-лар уонна бааһынай хаһаайыстыбалар салайааччылара санааларын этиннилэр. Урукку сылларга хас да хаһаайыстыба “Туймаада” уонна “Туймаада-Лизинг” хампаанньалар нөҥүө аныгы технологиянан механизациялаах улахан хотоннору туттан баран, бааннартан кирэдьиит ылбыттарыгар 220 мөл. солкуобайтан тахса иэстээх сылдьаллар. Кэмигэр кыайан төлөспөтөхтөрүгэр мэктиэлээбит (поручитель буолбут) “Туймаада” ҮХПХ-тан бааннар кинилэр иэстэрин тутан ылбыттар. Онтуларын төлөһүөхтээхтэр. Астыыр-үөллүүр комбинаттары кытта холбоон, 370 мөл. солкуобай кэриҥэ иэс мунньуллан сытар.
“Ил Дархан Айсен Николаев сорудаҕынан ол иһин хас биирдии хаһаайыстыбанан сыыппаралары түмэ сылдьабыт”, — диир тыа хаһаайыстыбатын миниистирэ Александр Атласов. Миниистир 2018 сылга 6 хотон, ол иһигэр иккитэ быйыл Мэҥэ Хаҥаласка М.Егоров аатынан уонна Бүлүүгэ “Мастаах” кэпэрэтииптэргэ тутуллубуттар, докумуоннарын федеральнай министиэристибэҕэ толуйуу үбүн ыларга ыыппыттарын, түмүгэ хайдах буолуо биллибэтин иһитиннэрдэ.
Василий НИКИФОРОВ, «Саха сирэ» хаһыат, edersaas.ru