Сунтаардааҕы В.Николаев аатынан норуот тыйаатыра «Хара саһыл» трагедия-испэктээгин 2015 сыллаахха Сергей Зверев үбүлүөйүгэр сүрэхтээбитэ. Икки сыл устата испэктээк ыыра кэҥээн, көрөөччүлэрэ элбээн, аны Дьокуускай куоракка сүрэхтэннэ.
Мария Кобельянова-Тускулаана, edersaas.ru сайтка анаан
Хара саһыл — күндү түүлээхтэн, Кыччаанай — иччилээх быдьар тыллаахтан, икки аҕа уус эстиитин, төрүт өбүгэбит олоҕун-дьаһаҕын, үгэстэрин көрдөрөр испэктээк хас биирдии көрөөччүгэ төһө да ыараханнык киирдэр, дьиҥ киһи киэбин, олох оҥкула маннык эмиэ буолуон сөбүн көрдөрөн киһини толкуйдатар. Бу көстүү билиҥҥи олоххо баай-дуол, сир-уот былдьаһыытын арылхайдык көрдөрөр. Испэктээк Сунтаарга иккитэ туран элбэх көрөөччүлэммитэ.Ону өссө ситэрэн-хоторон, өр сылларга норуот тыйаатыра ыра санаа оҥосто сылдьыбыт баҕатын толорон куоракка көстүбүтэ бэйэтэ туспа устуоруйа.
«Хара саһыл» Үүнэр көлүөнэ тыйаатырыгар туруоруллан, куорат олохтоохторун уонна Сунтаар дьонун түмэн, саала иһэ тобус-толору көрөөччүнэн туолла.
СӨ култуура миниистирэ, биир дойдулаахпыт Владимир Тихонов буор босхо тыйаатыры кэпсэтэн улахан көмө буолбутугар махталбытын биллэрэбит. Кини норуот тыйаатырын артыыстарыгар министиэристибэ аатыттан махтал суруктары туттартаата. Артыыстар бары да араас эйгэ үлэһиттэрэ. Үлэлэриттэн көҥүллэтэн, тыйаатыр туһа диэн кэлэн, Сунтаардарын ааттатан, бэйэлэрэ да астыннылар.
Испэктээк режиссера — Татьяна Заровняева, СӨ култууратын үтүөлээх үлэһитэ, салайааччы — Екатерина Григорьева, испэктээккэ М.И.Егорова-Тойуктаах Маарыйа, Прокопий Яковлев, Ефрем Афанасьев, Егор Кузьмин, Оксана Еремеева, Августина Егорова, Лилия Кириллина, Зоя Иванова, Гаврил Андреев, уо.д.а. оонньоотулар.
Мария КОБЕЛЬЯНОВА — ТУСКУЛААНА