Алтынньы 25-30 күннэригэр Грузия Тбилиси куоратыгар Fiestalonia Georgia аан дойдутааҕы бэстибээл ыытылынна. Маннык улахан таһымнаах куонкуруска Саха сириттэн «Туймаада» судаарыстыбаннай вокальнай ансаамбыл уолаттарын бөлөҕө кыттан, «вокал» номинацияҕа бастакы миэстэни ылла.
edersaas.ru
Ырыаны элбэх куоласка арааран толорууларынан көрөөччүлэргэ сөбүлэппит уолаттарбыт Мераб Парцхаладзе муусукатыгар «Күөл» диэн ырыаны грузинныы толорон, олохтоохтор уонна ыалдьыттар куттарын туттулар. Онтон Омук Уолун тылларыгар, Василий Еремеев матыыбыгар, СӨ искусствотын үтүөлээх деятелэ, ансаамбыл уус-уран салайааччыта Светлана Иванова тупсаран оҥоруутугар «Биһиги баарбыт — сахалар» ырыатынан саха норуотун билиһиннэрдилэр.
Куонкурус Тбилиси к. мээрин көҕүлээһининэн тэрилиннэ. Түмүккэ, үгэс курдук, кэлэктииптэр салайааччылара уонна педагогтара Европа анал сертификатын уонна Испания Королевствотын гербэлээх былааҥкатыгар суруллубут Махтал суруктары туттулар. Бастыҥ кэлэктииптэр уонна биирдиилээн толорооччулар Испания, Италия уонна Франция аан дойдутааҕы куонкурустарыгар кыттарга путевкалары ыллылар.
Манна даҕатан эттэххэ, Саха тыйаатырын «Хаарыан хампа күөх кытылым» испэктээгэ аан бастаан Тбилиси к. көрдөрүллүбүтэ уонна ССРС Судаарыстыбаннай бириэмийэтигэр түһэриллибитэ.
«Туймаадалар» Грузияттан кэлэн иһэн, Москваҕа Арассыыйа норуодунай артыыһа Надежда Бабкина салайар «Нуучча ырыата» ансаамбылы кытары көрсүөхтэрэ.
Надежда ЕГОРОВА, «Саха сирэ» хаһыат, edersaas.ru