Уус Алдан улууһун Тулуна сэлиэнньэтин “Татыйык” уһуйааныгар «Ийэ тыл — олох ситимэ» диэн Төрөөбүт тыл уонна сурук-бичик нэдиэлэтэ саҕаланна.
edersaas.ru
Бүгүҥҥү тэрээһиммит хомус лыҥкынас тыаһынан угуттанан, Ийэ тылга суолта биэрбит дьоммутун ахтан-санаан ааһан, үтүө күн алгыһын ылан, ыраастаныынан, саха норуотун сиэринэн арыылаах алаадьынан айах тутан саҕаланна. Нэдиэлэбит биир ураты үгэһинэн, олунньу 13 күнүгэр сылын аайы ыытыллар ааҕыы күнэ биир дойдулаахпытыгар, Бороҕон улууһун (билиҥҥитэ Уус-Алдан) суруйааччытыгар Г.Г.Вешников-Баал Хабырыыс төрөөбүтэ 100 сааһын көрсө, кини айымньыларын ааҕыыга ананна. Улахан бөлөх оҕолоро биирдиилээн бэйэлэрэ аахпыт эбит буоллахтарына, кыра бөлөх оҕолоругар арыый атын сүүрээни киллэрдибит. Ол курдук, кырачааннар дьиэ кэргэттэрин кытары ааҕыыларын тэрийдибит.
Манна Васильевтар, Окоемовтар, Неустроевтар, Федоровтар, Васильевтар дьиэ кэргэттэрэ кэлэн, Баал Хабырыыс хоһоонун доргуччу ааҕан, көрөөччү сэҥээриитин, хайҕабылын ыллылар. Тэрээһиммит кэлбит ыалдьыттары, төрөппүттэри кытта Баал Хабырыыс “Тыл” диэн хоһоонун күргүөмүнэн ааҕыынан түмүктэннэ.
Татьяна ВАСИЛЬЕВА.