Уус Алдан улууһун Тулуна нэһилиэгин «Татыйык» уһуйаанын иитээччилэрэ Ийэ тыл күнүгэр түбэһиннэрэн, оҕолору кыра саастарыттан саха норуотун олоҕун-дьаһаҕын, сиэрин-туомун, култууратын билиһиннэрэр сыаллаах, анал хоһу үөрүүлээх быһыыга-майгыга арыйан саламаатынан уонна алаадьынан айах туттулар.
Анивера Акимова, «Саха сирэ» хаһыат, https://edersaas.ru
Улахан бөлөх иитээччитэ Татьяна Васильева edersaas.ru сайтка маннык кэпсиир: «Биһиэхэ төрөппүттэрбит саамай эрэнэр, тутаах дьоммут буолаллар. Онон кинилэргэ махталбыт муҥура суох. Уһуйааммыт бэтэрээнэ, иитээччи, сүбэһиппит Анна Сторожева сахалыы таҥаһы-сабы, симэҕи аҕалан кырачааннарга көрдөрдө. Сахалыы астаах сандалы тула олорон оҕолору кытта кэпсэттэ.» Иитээччи Мария Сергеева бэйэтэ тикпит туос иһиттэрин көрдөрбүтүн оҕолор сэргээтилэр. Тэрээһин бүтүүтэ иитээччилэр уонна төрөппүттэр күргүөмүнэн Күндэ «Төрөөбүт төрүт тыл» хоһоонун аахтылар.
«Көмүлүөк оһох тигинэччи оттулла турара, холумтаҥҥа арыылаах алаадьы, сандалыга үтэһэҕэ үөлүллүбүт мунду, собо, баахыла оҥоһуктар дьиҥнээх курдук көстөллөр. Биир кырачаан алаадьыны амсайаары харбаан ылан күллэрдэ. Долбуурдарга мас, туос саха иһиттэрэ, оҥоһуктар дьаарыстанан тураллара киһини үөрдэр,»- диэн төрөппүттэр ааттарыттан Зинаида Васильева санаатын үллэстэр.
Анивера Акимова, «Саха сирэ» хаһыат, https://edersaas.ru