Тохсунньу тоһуттар тымныытыгар Үөһээ Бүлүү Маҥааһыгар дэриэбинэттэн икки көстөн тахса ыраах, туора сытар Үнньээн диэн күөлгэ сылгытыйбыт бургунас сүөһү көстөн, киһини сөхтөрбүтэ. Эбиитин, ынах уулааҕа биллэн, дьикти айылгылаах сүөһүнү аһынааччы, харыстыы санааччы, ураты бэлэх да курдук санааччы баар буолбута.
edersaas.ru
Онтон бэҕэһээ, киэһэ 10 чаас саҕана, Туоһахта тыһы ньирэйи төрөттө! Бүгүн хаһаайыттара Львовтары кытта кэпсэтэ сырыттым.
Уоллара Мирослав:
— Дьонум сабаҕалыылларынан, ынахпыт муус устарга төрүөхтээҕэ эбитэ үһү. Бэҕэһээ киэһэ аҕам ааһан иһэн Туоһахта аттыгар туох ыта сытарый диэн дьиктиргээн чугаһаан көрбүтэ, ынахпыт олох да субу төрөөн сытар эбит. Тута ньирэйи сылаас хотоҥҥо киллэрбиттэрэ. Туоһахта билигин да таһырдьа турар, олох да кыһаллыбат.
Билигин саҥа төрөөбүт ынаҕы ыал аҕата Василий күҥҥэ үстэ таһырдьа ыыр, үүтүн сылаастыы ньирэйчээҥҥэ иһэрдэллэр.
«Туоһахта уонна оҕотун туруктара үчүгэйдэр, ньирэй үүт-үкчү ийэтин курдук, сүүһүгэр эмиэ туоһахталаах.
Халлаан сылыйдаҕына, Туоһахта оҕотунуун көрсүөхтэрэ, ол кинилэргэ, биһиэхэ эмиэ ураты, умнуллубат күн буолуоҕа«, — диэн Мирослав долгуйа кэпсиир.
Кыракый ньирэйи маҥан хаарга холоон тулуурдаах, муус доруобай, төрөккөй буоллун диэн Хаарчаана диэн ааттаатылар.
Тарбыйах ийэтин курдук эмиэ биир ураты дьылҕалаах сүөһү буолуох курдук, көрөн-истэн, сытыы-хотуу буолсу, хотон иһигэр сүүрэкэлиир, ийэтин көрдөөн мэҥирээн бэбээрэр саҥата хотон иһинээҕи чуумпуну уйгуурдар.
Валентина Догоюсова, edersaas.ru сайтка анаан, Үөһээ Бүлүү