Үөһээ Бүлүү улууһун Туобуйа нэһилиэгэ улуус кииниттэн ыраах сытар. Саас, сайын, күһүн суол-иис быстар мөлтөҕүттэн табаары, бородууктаны илдьии уустуктары үөскэтэр. Ол үрдүнэн син хааччынан олороллор.
Итини хайдах быһааралларын Туобуйа нэһилиэгин баһылыга Степан Алексеев маннык кэпсээтэ:
– Олохтоох предприниматель Владимир Федотович Лукин Туобуйаҕа потребкооперация систиэмэтэ эстиэҕиттэн сыралаһан туран аһынан-үөлүнэн хааччыйар. Суол-иис быстар мөлтөх сиригэр ороскуотун аахсыбакка, тиэхиньикэлэрин харыстаабакка, сайыҥҥы кэмҥэ наадалаах бородууктаны кэмигэр анаан-минээн таспыта махталлаах дьыала. «УАЗ» массыыналарыгар бадараантан, мөлтөх суолтан иҥнибэт гына улахан көлүөһэлэри олорпута улаханнык туһалаата. Бородууктаны үксүн Дьокуускай куораттан аҕалар.
