Бэҕэһээҥҥиттэн норуот синоптига Тускул … сөтүө сезонун саҕалаата!
edersaas.ru
Тускул уон биэс сыллааҕыта бултуу сылдьан, биир күн үүтээҥҥэ олорон, ис иһиттэн суунуоҕун баҕаран кэлбит. Ол эрээри баанньыга суох сиргэ ханна суунуоҕай? Табаарыстарыгар ол санаатын эппитигэр биир киһи:
— Аармыйаҕа сылдьан биһиги сүүрэн кэлэн баран, хаарынан суунар этибит. Наһаа да үчүгэй буолара ол кэннэ! — диэн санаатын үллэстибит.
— Мин ону истэн баран: «Кырдьык даҕаны, боруобалаан көрбүт киһи», — диэн санаан баран, сарсыҥҥы күнүгэр хааман кэлээт, тахсан хаарынан «сууммутум». Ити алтынньыга этэ. Кырдьык, чэбдигирэ, мэктиэтигэр, ырааһыра түспүтүм. Онтон ыла күн бүгүҥҥэ диэри хаарынан да суунабын, тымныы уу да куттабын, муустаах ууга да сөтүөлүүбүн, — диэн кэпсиир Тускул.
Дьиэтин аттыгар баар ТЭЦ аттынааҕы күөлгэ сөтүөлээбитэ алтыс сыла эбит. Биир үтүө күн күөл аттынан сүүрэн иһэн, тымныы ууга сөтүөлээн ыларга санаммыт.
— Онтон ыла ыам ыйыттан сөтүө сезонун саҕалыыбын. Билигин пляжка сөтүөлүүбүн да, сарсын бу уум баар буолар эрэ, суох эрэ. Муус халҕаһалыы анньан иһэр этэ. Чэ, уу булан син биир сөтүөлүөм, — диэн кэпсиир Тускул.
Хаартыскаҕа ким түһэрбитин ыйыппыппар: «Николай Сыроватскай диэн киһини кытта билсибитим. Сарсыарда 7.00 ч. кини хайаан да сөтүөлүү сылдьар буолар. Хата, тиийэн киниттэн интервьюта ылаар эрэ. Миигин кини хаартыскаҕа түһэрбитэ. Ол хаартыскабын доҕотторум батсаап бөлөҕөр ыыппыппын, тарҕата охсубут этилэр«, — диэн кэпсиир.
Тускулу сорох дьон: «Ээ, хонтуораҕа олорон, интернети хасыһан, күнү-дьылы билгэлээминэ», — диэн хомуруйаллар. Итинник санааны тиэрдибиппэр сэһэргэһээччим:
— Мин айылҕаны үөрэтэн көрөр киһи быһыытынан Сахабыт сирин тымныытын бэйэм эппинэн-хааммынан билээри хаарынан суунабын, тымныы уунан куттабын, сөтүөлүүбүн. Доруобуйаҕа олус туһалааҕын биллим. Онон тымныыбытын эппитин-хааммытын бөҕөргөтөргө туһаныахпытын наада, — диэн хоруйдаата.
Дьэ, онон Тускул сөтүө сезонун аһан, тымныыбыт туһалааҕын өссө төгүл бигэргэттэ.
Елена ПОТОЦКАЯ, «Саха сирэ» хаһыат, edersaas.ru
Хаартыскаҕа Николай Сыроватскай түһэриитэ.