Тускул: «Бу өрөбүллэргэ улахан тымныы түһүөҕэ»

Ааптар: 
Бөлөххө киир:

Бу нэдиэлэҕэ Кириһиэнньэ тымныыта саҕаланна. Улахан тымныылар ордук бу өрөбүллэргэ буолаллара сабаҕаланар.

edersaas.ru


Бу туһунан норуот синоптига Тускул сиһилии маннык быһаарда:

— Киин улуустарга нэдиэлэ ортотуттан улахан тымныы түһүөҕэ. Ол курдук,  Илин эҥэргэ чэппиэргэ түүн -50 кыраадыс тымныы, күнүс -49, өрөбүллэргэ түүн -54, күнүс -49 кыраадыс тымныйаҕа. Чурапчыга өрөбүл күннэргэ -53, Ытык Күөлгэ — 52 кыраадыс тымныйыаҕа. Маннык күн-дьыл оптуорунньукка диэри туруоҕа. Онтон тымныы сыыйа намырыаҕа эрээри, 20-с чыыһылаттан эмиэ тымныйан барыаҕа.

Өтөрүнэн буолбатах тымныы хоту улуустарга бэлиэтэниэҕэ. Ордук тымныыларынан аатырар Өймөкөөн уонна Дьааҥы улуустарыгар улахан тымныылар бэлиэтэниэхтэрэ. Ол курдук, Өймөкөөҥҥө түүн -60, күнүс -59 кыраадыс бэлиэтэниэҕэ. Дьааҥыга түүн -58, күнүс -57 кыраадыс тымныы түһүөҕэ. Өрөбүл күннэргэ Индигиир уонна Халыма эҥэр  улуустарыгар түүн -53, күнүс -50 кыраадыс тымныы буолуоҕа. Арктика улуустарыгар Анаабырга, Өлөөҥҥө уонна Булуҥҥа түүн -40, күнүс -30 кыраадыска тиийиэҕэ.

Кыһыннара ичигэһинэн аатырар соҕуруу  Нерюнгри, Өлүөхүмэ, Ленскэй оройуоннарыгар бу өрөбүллэргэ түүн — 46, күнүс -42 кыраадыс, оттон Бүлүү эҥэр улуустарга -50, күнүс -47 кыраадыс  тымныйыаҕа.

Дьиҥэр, уруккута буоллар,  сэбиэскэй саҕана бу маннык тымныы түһэрин айылҕа тыйыс климаттаах усулуобуйатыгар олорорбут быһыытынан, буолуохтаах буолуохтааҕын курдук ылынар этибит. Ол эрээри кэлиҥҥи уонча сылларга улахан тымныы түспэккэ, кыһыммыт ичигэс буоларыгар үөрэнэн хааллыбыт. Ол курдук, былырыын Кириһиэнньэҕэ муҥутуур тымныы -46 кыраадыс тымныы этэ. Ол да иһин 50-тан тахсар кыраадыс тымныыттан улаханнык чаҕыйыах курдукпут.

Тохсунньуга антициклон саамай хамныыр кэмэ. Ол иһин улахан тымныылар бэлиэтэнэллэр. Өрөспүүбүлүкэ бары улуустарыгар бу өрөбүллээҕи тымныыны  Хотугу Муустаах муораттан уонна Иркутскай аллараа эҥэриттэн кэлбит антициклоннар холбоһон аҕаллылар. Ол иһин эмискэ тымныйда.

… Бу күннэргэ эмискэ тымныйан, үгүс оскуолаларга үөрэх чааһын тохтоттулар. Оттон ыраах айанныыр дьоҥҥо Тускул өрөбүл күннэргэ тохтуу түһэргитигэр сүбэлиир. 

Елена ПОТОЦКАЯ, «Саха сирэ» хаһыат, edersaas.ru 

Хаартыска: интэриниэттэн. 

+1
0
+1
0
+1
0
+1
0
+1
0
+1
0
+1
0