Тускул: «Саҥа дьылга халлаан сылыйыаҕа»

Ааптар: 
Бөлөххө киир:

“Быйыл кыһын тымныынан төһө хаарыйыай, эһиилги дьыл сааһа, сайына уонна күһүнэ хайдах туруктаах буолуой?” – диэн үгүс киһи интэриэһиргиир буолуохтаах.

Елена ПОТОЦКАЯ, «Саха сирэ» хаһыат, https://edersaas.ru/

Биһиги бу туһунан күн-дьыл туругун билгэлиир ырытааччыттан Тарас Тарасовтан-ТУСКУЛТАН кэпсииригэр көрдүстүбүт.

— Саҥа дьыл саҕана халлаан сылыйыа дуо? Урукку дьылларга сылаас күннэр турааччылар дии.

— Саҥа дьыл өрөбүллэригэр Ороһооспоҕо диэри өрөспүүбүкэ улуустарыгар барытыгар сылыйар чинчилээх. Ол эрээри тохсунньу ыйга Дьааҥыга, Индигиир улуустарыгар, Өймөкөөҥҥө, Уус-Маайаҕа, киин улуустарга сылыйар буоллаҕына, Мииринэй, Өлүөхүмэ, Бүлүү, Эдьигээн, Кэбээйи курдук арҕаа улуустарга тымныйыаҕа. 2017 сыл тохсунньута өрөспүүбүлүкэ улуустарыгар сүрүн “интириигэни” хотугу, киин уонна арҕаа улуустары кытта оҥоруоҕа. Охотскай муораттан сылаас циклон иһэр. Онон хотугулуу-илиҥҥи улуустарга үүнээри турар сыл бастакы ыйа ичигэс буолуоҕа. Олунньуга Саха сирин бары улуустарыгар тымныы күн-дьыл туруоҕа.

— Саас-сайын хайдах буолуоҕай?

— Саас эрдэ кэлэр чинчилээх. Күн-дьыл былырыыҥҥы туругун тутуһан иһэр. Онон бэс ыйа уонна от ыйа быйылгы дьыл курдук эмиэ тымныы буолуохтара. Күһүн эмиэ быйылгытын курдук уһуоҕа уонна сылаас туруоҕа. 2016 сыл күнэ-дьыла 1975 сыллааҕыга тэҥнэһэр. Онон 2017 сыл күнүн-дьылын туруга 1976 сыллааҕы курдук буолуоҕа.

Быйыл хаар чараас. Онон киин улуустарга от үүнүүтэ мөлтөх буолар чинчилээх.

… Тускул күнү-дьылы ырытыытын иһиттэххинэ, хайдах эрэ бэйэҥ да билбэккинэн, тымныыга-сылааска эрдэттэн “бырагыраамаланан” барарга дылы буолаҕын. Онон Тускул көмөтүнэн халлаан туругун эрдэттэн билэ олорорбут абыраллаах суол.

Елена ПОТОЦКАЯ, «Саха сирэ» хаһыат, https://edersaas.ru/

+1
0
+1
0
+1
0
+1
0
+1
0
+1
0
+1
0