Муус устарга Дьокуускай куорат биир оскуолатын салайааччыта сэллигинэн ыалдьыбытын туһунан сурах үгүс киһини аймаабыта. Чинчийии түмүгүнэн, оскуола үөрэнээччилэрин уонна үлэһиттэрин ортолоругар ким да сэлликкэ сыстыбатах.
Надежда ЕГОРОВА, «Саха сирэ» хаһыат, edersaas.ru
СӨ Доруобуйа харыстабылын министиэристибэтэ иһитиннэрэринэн, сэллиги утары охсуһар диспансер уонна СӨ Роспотребнадзорын управлениетын исписэлиистэрэ ыарыы өрө туруутун бопсор киэҥ хабааннаах дьаһаллары ыыттылар. Ол курдук, оскуола 866 үөрэнээччитэ туберкулинодиагностиканы ааста, 216 үлэһитэ флюорографияҕа түстэ. Бу чинчийиилэр түмүктэринэн, оскуола үөрэнээччилэрин уонна үлэһиттэрин ортолоругар ким да сэлликкэ сыстыбатаҕа, ыалдьыбатаҕа билиннэ.
Оскуола төрөппүттэрин кэмитиэтин көрдөһүүтүнэн, СӨ Доруобуйа харыстабылыгар министиэристибэтин, Дьокуускай к. сэллиги утары охсуһар диспансерын, Роспотребнадзор, үөрэх куораттааҕы управлениетын исписэлиистэрэ төрөппүттэргэ быһаарар-сырдатар үлэни ыыттылар уонна интэриэһиргиир ыйытыыларыгар хоруйдаатылар. Дезинфекция, ыраастаныы, сууйуу-сотуу үлэтэ хаһааҥҥытааҕар да кичэллээхтик ыытылынна.
Доруобуйа харыстабылын министиэристибэтэ сэллиги сэрэтэр уонна эрдэттэн быһаарар туһуттан сыл аайы тустаах эмчиттэргэ көрдөрөргө, диспансеризацияҕа кыттарга, сылга биирдэ флюороографияҕа түһэргэ ыҥырар. Оттон оҕолор туберкулинодиагностикаттан аккаастаныа суохтарын наада. Манна даҕатан эттэххэ, кэнники сылларга төрөппүттэр туберкулинодиагностикаттан аккаастанан, оҕолор ыалдьар кутталларын, төттөрүтүн, улаатыннараллар.
Надежда ЕГОРОВА, «Саха сирэ» хаһыат, edersaas.ru
Ыспыраапка:
Туберкулинодиагностика — организмҥа сэллик микобактериятын антигена баарын быһаарар ньыма (туберкулиновай боруоба көмөтүнэн).