Саҥа олимпийскай циклга тустууга күрэхтэһии хайдах быһыылаахтык уларытыллан ыытылларын уонна быраабылаҕа туох саҥа киллэриилэр баар буолуохтарын сөбүн туһунан бу иннинэ сырдатан турабын. Ону бигэргэтэн бэҕэһээ WRESTRUS.RU сайтка Россия спортивнай тустууга федерациятын президенэ, Тустуу аан дойдутааҕы холбоһугун (UWW) техническэй хамыыһыйатын салайааччыта Михаил Мамиашвили интервьюта таҕыста.
Петр ПАВЛОВ, «Саха сирэ», edersaas.ru
Ол курдук, аҕыйах хонуктааҕыта Белград куоракка, UWW президенэ Ненад Лалович кыттыылаах техническэй хамыыһыйа сүбэ мунньаҕар күрэхтэһиини тэрийэн ыытыы боппуруостара көрүллүбүттэр. Ол түмүгүнэн, уһун быһаарсыы, дириҥ ырытыһыы кэнниттэн хас даҕаны саҥа уларыйыылар ылыллан, UWW бюротун көрүүтүгэр киллэриллибиттэр. Манна даҕатан эттэххэ, тустууга саҥа уларыйыылар быйыл буолбакка, 2018 сылтан киириэхтэрэ.
Саҥа уларыйыы биир сүрүн, киһи болҕомтотун тардар түгэнинэн ыйааһыннар уларыйыылара буолар. Ол курдук, улахан дьон тустуутугар 10 ыйааһын баар буолуо, итинтэн алтата – олимпийскай. Оттон эдэрдэр күрэхтэһиилэрэ 11 ыйааһынынан ыытыллар буолуоҕа.
Эдэрдэргэ ыйааһыннар маннык буолуохтарын сөп: 48-51-54-57-60-64-69-75-81-91 уонна 91-тэн үөһэ кг.
Иккиһинэн, аны күрэхтэһии биир ыйааһыҥҥа икки күн ыытыллар буолуоҕа. Бастакы күн – барыллааһын хапсыһыылар, иккис күн – финалга тахсар иһин киирсии уонна финал. Ыйааһыннаныы эмиэ икки күн. Бу саҥа уларыйыылары бюро чилиэннэрэ икки ый иһинэн көрөн, үөрэтэн баран бүтэһиктээх түмүгү таһаарыахтара.
Петр ПАВЛОВ, «Саха сирэ», edersaas.ru