Аҕыйах хонуктааҕыта буолбут бырабыыталыстыба мунньаҕар Саха Өрөспүүбүлүкэтин Ил Дархана Егор Борисов Култуура, духуобунай сайдыы министиэристибэтигэр тустуук Виктор Лебедев туһунан киинэни уһулууга көмө-ньыма буоларыгар сорудахтаата. edersaas.ru
Режиссер Татьяна Эверстова саҥа хартыынатыгар көҥүл тустууга аан дойду икки, Арассыыйа алта төгүллээх чөмпүйүөнэ, Европа оонньууларын кыайыылааҕа, спорт үтүөлээх маастара Виктор Лебедев туһунан кэпсэниэҕэ.
Култуура миниистиригэр Владимир Тихоновка туһаайан Егор Афанасьевич АЛРОСА хампаанньа бэрэсидьиэнэ Сергей Иванову кытта көрсүһүүтүгэр Татьяна Эверстова бырайыагын өйүөххэ наадатын туһунан тылын тиэрдибитин, онон министиэристибэ хампаанньаҕа официальнай суругу бэлэмнииригэр, инникитин даҕаны көмөлөһөрүгэр эттэ.
Ил Дархан Арассыыйа бэрэсидьиэнэ Владимир Путин соторутааҕыта тустуук Виктор Лебедев туһунан үтүө тылынан ахтыбытын санатта, итинэн туһаныахха баара диэтэ.
Билэргит курдук, Татьяна Эверстова “Его дочь” диэн бастакы улахан үлэтэ араас бэстибээллэргэ үрдүктүк сыаналаммыта. “Окно в Европу” диэн Выборгтааҕы киинэ-бэстибээл Гран-притын хаһаайынынан буолбута, жюри анал бирииһинэн бэлиэтэммитэ. Бастакы Ураллааҕы бэстибээл “Бастыҥ дебют” бирииһин ылбыта.
Роман Попов, “Саха сирэ” хаһыат, edersaas.ru