Арассыыйа Суруналыыстарын сойууһун чилиэнэ, Арассыыйа Бочуоттаах кинематографиһа, үлэ, спорт, Саха сирин киинэтин бэтэрээнэ Платон Коркин бүгүн Чурапчыга «Кинилэр ааттара ааттаныа» диэн бастакы кинигэтин сүрэхтээтэ.
edersaas.ru
Платон Васильевич 70- с сыллартан саҕалаан Чурапчытааҕы «Саҥа олох» хаһыат уопсастыбаннай кэрэспэдьиэнин быһыытынан спорт тиэмэтигэр ылсан үлэлэспитэ. Кэлин «Саха сирэ» хаһыат ааҕааччылара кини үгүс ыстатыйатын кэтэһэ ааҕар буолбуттара. Ааптар тустуу улуу тириэньэрэ Дмитрий Коркин, чулуу спортсменнар Павел Пинигин, Роман Дмитриев, Чурапчы спордун, о.д.а. туһунан суруйан кэллэ.
Кинигэ 150 тирээһинэн «Саҥа олох» типографиятыгар бэчээттэнэн таҕыста. Хаһыат эрэдээктэрэ (билигин улуустааҕы дьокутааттар сэбиэттэрин бэрэссэдээтэлэ) Афанасий Захаров көҕүлээһининэн бэчээттэннэ. Манна Платон Васильевич хаһыакка суруйбут ыстатыйалара түмүллэн таҕыстылар.
Кинигэ сүрэхтэниитигэр улуус баһылыга Андрей Ноговицын, улуус сэбиэтин бэрэссэдээтэлэ Афанасий Захаров, «Саха сирэ» хаһыат дэлэгээссийэтэ, спорду сэҥээрээччилэр кыттыыны ыллылар.
Аграфена КУЗЬМИНА, «Саха сирэ» хаһыат, edersaas.ru