Былырыын аймахтарым Дьокуускай куорат 16-с кыбартаалыгар тутуллубут саҥа дьиэттэн кыбартыыра атыыласпыттара эрээри, күн бүгүнүгэр диэри бас билии докумуонун ыла иликтэр. Онтубут баара, тутар тэрилтэ эбийиэк үлэҕэ киириитин болдьоҕун уһатар тэрилтэлэр ахсааннарыгар киирэ сылдьар эбит.
Анивера АКИМОВА, «Саха сирэ» хаһыат, edersaas.ru сайт
Дьокуускай куоракка эрэ буолбакка, бүтүн өрөспүүбүлүкэ үрдүнэн олорор дьиэни тутуу ахсаана элбии турар. Ол эрээри сорох тутааччылар дуогабардарын тутуспакка, хас даҕаны сылы быһа тутууларын сыһаллар-соһоллор. СӨ Тутууга уонна дьиэни-уоту кэтээһиҥҥэ судаарыстыбаннай саламтата эбийиэк үлэҕэ киириитин болдьоҕун уһатар хампаанньалар испииһэктэрин таһаарда, манна киирбит төрүөттэрин ыйда:
1.«Агентство недвижимости «Доступное жилье» ХЭУо 16 кыбартаалга 30 кыбартыыралаах дьиэ таһыгар 17 кыбартыыралаах дьиэни бастакы декларациятын быһыытынан, 2015 сыл төрдүс кыбаарталыгар үлэҕэ киллэриэхтээх этэ. Онтун 2016 сыл бүтүүтүгэр көһөрбүтэ. Билигин дьиэ 100% бэлэм турар. Ол эрээри, сир учаастагын кыраныыссатыгар уларыйыылар тахсаннар, «Синяя птица» ХЭУо территориятыгар «киирбит». Онтулара даҕаны улахана суох – 25 кв миэтэрэ. Билигин «Синяя птица» ХЭУо 25 кв миэтэрэ иһин 11 мөл. солк. көрдүүр.
2. «ИНКОМ» ХЭУо Бүлүүлүүр суол 6-с килэмиэтиригэр 9 кыбартыыралаах дьиэни маҥнайгы декларациятыгар олоҕуран, 2015 сыл бүтүүтэ хамыыһыйаҕа туттарыахтаах этэ. Докумуоҥҥа уларытыылары киллэрэн, 2016 сыл төрдүс кыбаарталыгар көһөрбүтэ. «Нова-С» өрөспүүбүлүкэ киин куоратын 23 кыбартаалыгар 58 кыбартыыралаах дьиэни 2014 сыллааҕыта тутуохтаах этэ даҕаны, билигин да улахан хамсааһын тахса илик.
3. «Ормикс» ХЭУо Дьокуускай куорат 141-с кыбартаалыгар 147 кыбартыыралаах олорор дьиэни үс сыл анараа өттүгэр туттарыахтааҕа. Тутуу хаамыыта бытааран, билигин 60%-на эрэ бэлэм турар.
4. «Сахастройгрупп» ХЭУо. Бүлүү куоракка Октябрьскай уулуссаҕа 24 кыбартыыралаах дьиэ «кыттыгас тутуу» ньыматынан 2013 сылтан тутулла турар. Тэрилтэ өлүүлэһэн тутааччылар харчыларын биэрэн быстыбакка, сыарҕа үрдүттэн олоруу балаһыанньата үөскээтэ. Тутуу 75%-на бэлэм.
5. «Симиир» ХЭУо үп-харчы хабалатыгар ыктаран, Сайсары уокуругар Чайковскай уулусса 117/3 дьиэтин үлэҕэ киллэриэ өссө да ыраах. Маннык балаһыанньаҕа «СПФ Черов и К» тэрилтэ эмиэ киирэн олорор. Ильинка оройуонугар 24-түү кыбартыыралаах Б-7 уонна А-О дьиэлэри үлэҕэ киллэрэ илик.
Анивера АКИМОВА, «Саха сирэ» хаһыат, edersaas.ru сайт