Сайын кэлэн устудьуоннар сессияларын сабан, сынньалаҥҥа эбэтэр быраактыкаҕа бараары бэлэмнэнэ сылдьаллар. Ону кытта тутар этэрээттэр байыастарын үлэлэрэ саҕаланар. Саҥа үлэ сезонугар бэлэмнэнии, туох уларыйыы киирбитин Саха сирин регионнааҕы штабын пресс-киинин салайааччы Степан Павлов кэпсиир:
— Быйылгы үлэ сезонугар тас региоҥҥа үлэлиир, тыа хаһаайыстыбатын, медицинскэй, «Путина», педагогическай, сервиснэй, профильнай уонна Ил Дархан этэрээттэригэр арахсан үлэлиэхпит. Ил Дархан этэрээттэрэ үксүн куораты көҕөрдүү, кырааскалааһын уонна өрөмүөн үлэтинэн дьарыктаныахтара. Педагогическай этэрээттэр сайыҥҥы оҕо лааҕырдарыгар, тас региоҥҥа үлэлиир этэрээттэр Камчаткаҕа балык үлэтигэр уонна Амурскай уобаласка «Восточнай» космодрому тута бараллар. Этэрээттэр үлэлэрин Саха сиригэр үлэлиир штабтар салайаллар. Уопсайа өрөспүүбүлүкэ үрдүнэн үс устудьуоннар тутар этэрээттэрин штаба баар: Хотугулуу-Илиҥҥи федеральнай университет устудьуоннарын этэрээттэрин штаба, орто идэҕэ үөрэхтээһин штаба, Тыа хаһаайыстыбатын академиятын штаба уонна «Педагогическай этэрээттэр» ыччат уопсастыбаннай хамсааһына. Бу штабтар үлэлэрин барытын Саха сирин регионнааҕы штаба салайар.
Эппитим курдук, Саха сирин этэрээттэрэ өрөспүүбүлүкэ иһигэр эрэ буолбакка, Арассыыйа араас регионнарыгар баран үлэлииллэр. Быйыл муус устар 8 күнүттэн Өксөкүлээх Өлөксөй аатынан «Харысхал» этэрээт Амурскай уобаласка “Восточнай» космодром тутуутугар үлэлии барбыта. Биир этэрээт сайын Камчаткаҕа «Лойд-Фиш» хампаанньаҕа балыкка үлэлии барыаҕа. Билигин онно оҕолору сүүмэрдии сылдьабыт.
Бу сылтан Саха сирин регионнааҕы штаба Арассыыйа сүрүн судаарыстыбыннай «РОСАТОМ» корпорациятын кытары үлэни саҕалаата. Бу чэрчитинэн Тыгын Дархан аатынан «Хранители» этэрээт Озерск куоракка атомнай электростанцияны тута барыаҕа.
Быйыл Бүтүн Арассыыйа тутар этэрээттэрин слетун бэлиэтин оҥорууга күрэхтэһии ыытыллыбыта. Дьүүллүүр сүбэ быһаарыытынан, кыайыылаах аатын саха дизайнера Петр Доргуев сүкпүтэ үөрдэр. 2017 сыл Саха сиригэр устудьуоннар тутар этэрээттэрин хамсааһына төрүттэммитэ 50 сыллаах үбүлүөйүн бэлиэтииллэр. Онон сиэттэрэн, бу сылга элбэх тэрээһин ыытыллыахтаах. Ол курдук, кинигэ бэчээттэниитэ, өйдөбүнньүк туруоруута уонна Арассыыйа устудьуоннарын этэрээттэрин слетун Дьокуускай куоракка тэрийии үлэтэ. Бу слет биһиги өрөспүүбүлүкэбитигэр аан маҥнайгытын ыытыллар. Онон үлэбит-хамнаспыт баһаам, үлэ күөстүү оргуйар!
Николай ПОПОВ, edersaas.ru