Бэҕэһээ СӨ Бырабыыталыстыбатын оробуочай бөлөҕө Тойбохой, Сунтаар нэһилиэктэринэн сылдьан, сыллааҕы үлэтин отчуоттаата. Отчуокка олохтоохтор көхтөөхтүк кыттар буолбуттарын бэлиэтии көрдүм.
edersaas.ru
Отчуот түмүгэр, бырабыыталыстыбата бэрэссэдээтэлин бастакы солбуйааччыта П.Н.Алексеев биһиги биир дойдулаахтарбытын чиэстээн туран, наҕараадалары туттартаата. Ол курдук, СӨ Тыа хаһаайыстыбатын уонна ас-үөл бэлиитикэтин министиэристибэтин бирикээһинэн, тыа хаһаайыстыбатын сайдыытыгар тус кылаатын, өр сыллаах үлэтин иһин «Саха сирин агропромышленнай комплексын Бочуоттаах үлэһитэ» аат үлэ тыыл бэтэрээнигэр, Күндэйэ нэһилиэгин, Сунтаар улууһун Бочуоттаах олохтооҕо Николай Егорович Сергеевка иҥэрилиннэ.
Оттон тыа хаһаайыстыбатын сайдыытын туһугар таһаарыылаах үлэлэрин иһин, туһааннаах министиэристибэ 95-сыллаах үбүлүөйүнэй мэтээлинэн «Сунтаар» сопхуос үүнээйи үүннэрэр «Дорбой» биригээдэтин биригэдьиирэ, “Бочуот знага” уордьан кавалера, «Үлэ Албан Аата» уордьан кавалера Елена Спиридонова Сидорова, үлэ бэтэрээнэ Аллыҥа нэһилиэгин олохтооҕо, бааһынай хаһаайыстыба, «Тойбохой» сопхуоска өр сылларга ыанньыксыттаабыт Альбина Петровна Саввинова, «Сунтаар» сопхуос Туойдаах отделениятын биригэдьиирэ, Тэҥкэ нэһилиэгин Бочуоттаах олохтооҕо Розалия Ефимовна Сидорова наҕараадаланнылар.
Тимур Иванов, Сунтаар, edersaas.ru сайтка анаан