Тыа хаһаайыстыбатын табаарын оҥорооччулар оттугу-уматыгы атыылаһалларыгар субсидия көрүлүннэ

Оттук-уматык сыаната үрдээн иһэринэн, Россия Бырабыыталыстыбатын саппаас пуондатыттан тыа хаһаайыстыбатын үлэтин-хамнаһын тэрийиигэ Уһук Илин федеральнай уокурук аҕыс субъегар 90 тыһ. т оттугу-уматыгы атыылаһарга 46 мөл. солк. көрүлүннэ.

Итинтэн Саха өрөспүүбүлүкэтигэр 3 мөл. 87 тыһ. солк. бэриллиэҕэ. Бу туһунан Ыйаахха Бырабыыталыстыба Бэрэссэдээтэлэ Дмитрий Медведев илии баттаата.

— Сыана үрдээбитинэн, сэлиэктэринэн сүбэ мунньахха мин тыа хаһаайыстыбатын тэрилтэлэрэ оттугу-уматыгы атыылаһар ороскуоттарын сорох чааһын толуйар туһунан дьаһалы биэрбитим. Көрүллүбүт харчы эрэгийиэннэр бүддьүөттэригэр тиэрдиллэн, быйылгы сылга 90 тыһ. туоннаттан итэҕэһэ суох оттугу-уматыгы атыылаһарга тирэх буолуоҕа. Хомуур үлэтэ саҕаланна, онон хаһаайыстыбаларга харчы уталыппакка тиэрдиллиэхтээх, – диэтэ Дмитрий Медведев Бырабыыталыстыба мунньаҕар.

Санатан эттэххэ, бу үп “2013-2020 сс. тыа хаһаайыстыбатын сайдыытын уонна тыа хаһаайыстыбатын бородууксуйатын, сырье уонна ас-үөл ырыынагын сүрүннээһин” судаарыстыбаннай бырагыраама чэрчитинэн көрүллэр. Бу туһунан Уһук Илин сайдыытын министиэристибэтэ иһитиннэрдэ.

Раиса СИБИРЯКОВА, “Саха сирэ” хаһыат, edersaas.ru