Тыа сиригэр тутууну кэпэрэтииптэр сүрүннүөхтэрэ

Бөлөххө киир:

РФ Тутуутун уонна олорор дьиэ коммунальнай хаһаайыстыбатын министиэристибэтин иһинээҕи Уопсастыбаннай сэбиэт тыа сирин тутуутугар, тыа сиригэр инфраструктураны, тутуу индустриятын уонна олохтоох тутуу матырыйаалларын сайыннарыыга хамыыһыйата быйыл кыһын ахсынньыга дьон атыылаһарыгар сөптөөх дьиэни-уоту тутууга туһуламмыт регионнардааҕы бырагыраамалары оҥоруохтаах оробуочай хамыыһыйаны тэрийбитэ. Бу хамыыһыйа Россия үгүс олохтоохторугар, ол иһигэр тыа сирин ыалларыгар, олорор дьиэ сыаната удамыр буоларын ситиһэр инниттэн этиилэри, сүбэлээһиннэри түмэн киллэрэр сыаллаах.

Василий Никифоров, edersaas.ru

Оробуочай хамыыһыйа бастакы мунньаҕа б.дь. олунньу 3 күнүгэр Москваҕа Тутуу уонна олорор дьиэ коммунальнай хаһаайыстыбатын министиэристибэтигэр ыытыллыаҕа. Онно тыа сирин уонна дойду кыра куораттарын олохтоохторун табыгастаах, тупсаҕай дьиэнэн хааччыйар боппуруоһу быһаарыыга тыа хаһаайыстыбатын потребительскай хааччыйар тутуу кэпэрэтииптэрин тиһигин тэрийии туһунан дьүүллэһиэхтэрэ. Мунньахха маннык кэпэрэтииптэри тэрийэргэ интэриэстээх предпринимателлэр, регионнардааҕы ситэриилээх былаас уорганнарын бэрэстэбиитэллэрэ кыттыахтара. Чопчу эттэххэ, Саха сириттэн, Хакасияттан, Тываттан, Татарстантан, Крымтан, Красноярскай уонна Забайкалье кыраайдарыттан, Омскай, Томскай, Нижегородскай, Орел, Ярославль уобаластарыттан түмсүөхтэрэ.

Биһиги өрөспүүбүлүкэбититтэн ити мунньахха ыҥырыы туппут тыа хаһаайыстыбатын уонна ас-үөл бэлиитикэтин миниистирин солбуйааччы Николай Петров этэринэн, Саха сирэ пилотнай бырайыакка бастакынан киллэриллиэх курдук. “Тутуу кэпэрэтиибин тэриннэхпитинэ, ол нөҥүө тыа сиригэр олорор дьиэни эрэ буолбакка, тыа хаһаайыстыбатын производственнай эбийиэктэрин тутууну барытын хонтуруоллуох этибит. Быстахтык ыллахха, тутуу хаачыстыбатын, сыананы сүрүннүүр кыахтаныахпыт”, — диир Николай Ильич.

Оробуочай хамыыһыйа мунньаҕар Саха сириттэн Н.Петрову сэргэ бырабыыталыстыба бэрэссэдээтэлин бастакы солбуйааччы-тыа хаһаайыстыбатын уонна ас-үөл бэлиитикэтин миниистирэ Петр Алексеев, “Адгезия” ХЭУо дириэктэрэ Михаил Охлопков дэлэгээт итиэннэ Сунтаар нэһилиэгин баһылыга Эдуард Филиппов, Хара нэһилиэгин (Мэҥэ Хаҥалас) баһылыга Дария Назарова муниципальнай былаастан бэрэстэбиитэл быһыытынан кыттыахтара.

Василий Никифоров, edersaas.ru

+1
0
+1
0
+1
0
+1
0
+1
0
+1
0
+1
0