«Сахамедиа» холдинг «Саха сирин киэн туттуута» диэн норуот бириэмийэтэ бырайыагын ааҕааччылар олус сөбүлээтилэр.
edersaas.ru
Ол курдук, бу бириэмийэҕэ норуот бэйэтэ бастыҥ бырааһы, учууталы, урбаанньыты, култуура үлэһитин уо.д. а. номинацияларынан куоластаан талбыттара. Сайыҥҥы кэмҥэ тустаах үлэһиттэр уоппускаҕа сылдьалларынан сибээстээн, бырайыак үлэтэ тохтоон баран, балаҕан ыйыттан «Тыа сирин бастыҥ үлэһитэ» номинация биллэриллибитэ. Сайаапкалары хомуйуу балаҕан ыйын 27 күнүгэр түмүктэнэн баран, алтынньы 1 күнүттэн интэриниэт-куоластааһын ыытыллар.
Норуот бириэмийэтин бырайыагар Саха сирин улуустарыттан 27 киһи сайаапкатын биэрдэ. Ол курдук, Нерюнгри, Дьааҥы, Бүлүү, Орто Халыма, Ньурба, Уус Маайа уо.д.а улуустартан тыа хаһаайыстыбатыгар үлэлиир дьон кытталлар. Куоластааһын нөҥүө кыайыылаах быһаарыллыа. Биллэн турар, тыа сиригэр олорор дьон үгүс. Онон сытыы киирсии буолара сабаҕаланар.
Куонкуруска Саха сиригэр олорор 18-тан үөһээ саастаах фермердэр, оҕуруотчуттар, сүөһү көрөөччүлэр, табаһыттар, сылгыһыттар, механизатордар, агрономнар, тырахтарыыстар, зоотехниктар, мелиоратордар уо.д. а., тыа хаһаайыстыбатын салаатыгар үлэлиир дьон кытталлар.
«Саха сирин киэн туттуута» норуот бириэмийэтин «Тыа сирин бастыҥ үлэһитэ» номинациятыгар кыттааччылар тустарынан СИА саайтыгар киирэн ааҕыахха сөп. Дьэ, онон сарсыҥҥыттан YSIA.RU сайтка куоластааһыҥҥа кыттаргытыгар ыҥырабыт!
Елена ПОТОЦКАЯ, «Саха сирэ» хаһыат, edersaas.ru