Олимпиада-2018: “Тыл барда – бас барда” диэни Кадыров төһө тутуһарын көрүөхпүт

Cпортсменнарбыт Олимпиадаҕа кыттыыларын боппуруоһугар, Чечня баһылыга Рамзан Кадыров үрдүкү салалта санаатын таайбакка, тылынан ыаһахтаммыта. Онон, бэйэтин бэйэтэ угаайыга киирбит курдук балаһыанньаланна.

Чечня баһылыга Рамзан Кадыров Соҕуруу Кореяҕа буолар Олимпийскай оонньууларга Чечняҕа пропискалаах спортсменнар кытталларын боппутун, ол оннугар «Оонньууларга барыахтаах спортсменнары кыайыылаахтар курдук чиэстиэхпит» диэн эрэннэрбитин туһунан РБК агентство иһитиннэрэн турар.

Өрөспүүбүлүкэ баһылыга бэйэтин Telegram-ханаалыгар «Арассыыйа олохтоохторо бэйэлэрин былаахтарынан күрэхтэһиэхтээхтэр, бэлиитиктэр бэлиитиктэри, оттон спортсменнар спортсменнары кытта күрэстэһиэхтээхтэрин» суруйбута…

Онтон аҕыйах чаас буолан баран, дойду бэрэсидьиэнэ Владимир Путин Горькайдааҕы массыына собуотун («ГАЗ») үлэһиттэрин кытта көрсүһүүтүгэр МОК ылыммыт быһаарыытыгар бэйэтин санаатын үллэстибитэ. Онно Владимир Владимирович:

— Бастакытынан, маныаха сылтах биэрбиппитинэн биһиги бэйэбит буруйдаахпыт диэн быһаччы этиэххэ наада. Иккиһинэн, ити сылтаҕынан, сымнатан эттэххэ, олус чиэһинэйэ суохтук туһаннылар. Үгүс буруйдааһыннар ханнык да дакаастаммыт чахчыга олоҕурбаттар, кураанах тылынан эрэ буруйдааһын, — диэн эппитэ, итиэннэ  «олимпиецтар Оонньууларга кыталларын былаас туорайдаһыа суоҕун» диэбитэ. Арассыыйа бэрэсидьиэнэ бүтэһиктээх быһаарыныы ахсынньы 12 күнүгэр буолар спортсменнар, тириэньэрдэр кыттыылаах мунньахха ылыныллыаҕын бэлиэтээбитэ.

Ити аата, регион салайааччыта уона дойду бэрэсидьиэнэ Олимпиадаҕа кыттыы боппуруоһугар хардарсардык эттилэр. Кадыров үрдүкү салалта санаатын таайбакка, тылынан ыаһахтанан бэйэтин бэйэтэ угаайыга киллэрбит курдук балаһыанньаланна. Былыр маны сахалар “тыл барда – бас барда” дииллэрэ.

Маны суруналыыстар сыыска түһэриэхтэрэ баара дуо — “МК-ru” таһаарыы Кадыров кими Соҕуруу Кореяҕа ыыппатын туһунан этэрэ буолла, Чечня боксердартан, тустууктартан ураты Олимпийскай оонньууларга кыттар таһымнаах спортсмена суох ээ диэн эҕэлээн суруйа оҕуста.

Путин, уруккута бэйэтэ спортсмен буолан эбитэ дуу, бэлитиичэскэй атын биричиинэнэн салайтаран дуу, олимпиецтар интэриэстэрин өрө тутта. Маннык этии “Бастатан туран, судаарыстыба интэриэһэ” дии сылдьыбыт Кадыровка соһуччу буолла. Быһата, Чечня баһылыга улаханнык сыыстарда. Билигин хайдах буолуон билбэккэ олороро чуолкай: биир өттүнэн, Путины кытта сөбүлэһиэн наада курдук, иккис өттүнэн, эр киһилии тылыгар турарын көрдөрүөн наада. Тугу диирин биһиги кэтээн көрүөхпүт. Бу күннэргэ инстаграмыгар (3,1 мөл. сурутааччылаах ) итини суруйара буолуо.

Бу иннинэ айахтарын муҥунан «Олимпиаданы бойкуоттуурга!» — дии сылдьыбыт бэлиитиктэр, чунуобунньуктар, дьокутааттар, спорт комментатордара Путин этиитин кэнниттэн сорохторо тылларын быһа ыстаан ньимиликээн буоллулар, сорохторо МОК даҕаны былааҕынан буоллун, хайаатар да барыахтаахпыт, барыларын кыайыахтаахпыт, күүстээхпитин көрдөрүөхтээхпит диэн этэн-тыынан турдулар.

“МК-ru” дьоһуннаах, түспэ көрүҥнээх дьүһүн кубулуйумтуолары, бинсээктээх, хаалтыстаах, ситиһиилээх, кэскиллээх уопсастыбаннай санааны саҕааччылары туораттан кэтээн көрүөххэ көрүдьүөс баҕайы, барахсаттарыҥ баара толкуйдуу түһэн баран саҥараллара буоллар олус да маладьыас буолуох этилэр диэн элэктээн суруйар.

Эрдэ иһитиннэрбиппит курдук, МОКбэйэтин быһаарыытынан Соҕуруу Кореяҕа ыытыллар кыһыҥҥы Олимпийскай оонньуулар кэмнэригэр Арассыыйа Олимпийскай кэмитиэтин ууратта. Пхёнчхаҥҥа буолар күрэхтэһиилэргэ киллэриллибит Арассыыйа спортсменнара МОК былааҕынан эрэ кытталлара көҥүллэннэ.

Роман Попов, “Саха сирэ” хаһыат.