Өрөспүүбүлүкэҕэ тыа сирин тиэхиньикэнэн уонна саппаас чааһынан хааччыйыыга тахсыылаахтык үлэлиир биллэр предприниматель, меценат Руслан Федотов кэмиттэн кэмигэр ыытар араас ис хоһоонноох акцияларын тыа сирин олохтоохторо олус сэргииллэр уонна кэтэһэллэр.
Женни СТРЮКОВА, «Саха сирэ» хаһыат, edersaas.ru
Предприниматель сандал сааһынан уочараттаах акциятын ыытар. Ол курдук, СӨ тыа хаһаайыстыбатын министиэристибэтэ биэрэр граннарыгар (“Саҥа саҕалыыр фермер”, сылгы баазатын тэриниигэ уо.д.а) тиксибит фермердэр, бааһынай хаһаайыстыбалар Руслан Федотов маҕаһыыннарыттан тыраахтар ыллахтарына, кинилэргэ куукуна миэбэлин бэлэх биэриэхтэрэ.
500 тыһ. тахса солк. оборудование атыыласпыттарга тутууга наадалаах инструменнары бэлэхтиэхтэрэ. Оттон кыра суумаҕа ыллахтарына даҕаны өттүк харалаах, илии тутуурдаах барыахтара.
“Федотов Р.Е.” ИП кылаабынай буҕаалтыра Анисья Федотова маннык кэпсээтэ:
— Граннаах фермердэр биһигиттэн хотон тутталларыгар наадалаах тутуу матырыйаалын эмиэ ылыахтарын сөп. Көрөргүт курдук, бэлэхпит төһө суумалааҕы атыылаһалларыттан тутулуктаах. Биир “МТЗ-82” тыраахтары хайы-үйэ уурдардылар. Бу күннэргэ Хаҥалас улууһун Уулаах Ааныттан кэлэн ылыахтаахтар. Онон СӨ Тыа хаһаайыстыбатын министиэристибэтиттэн бары граннаахтары суолу баттаһа Аллараа Бэстээххэ баар маҕаһыыннарбытыгар кэлэн билсэргитигэр, наадыйаргытын атыылаһаргытыгар ыҥырабыт. Оччоҕо биһиги бэлэхпитин тутуоххут. Акциябыт кулун тутар 26 күнүттэн саҕаланар.
Женни СТРЮКОВА, «Саха сирэ» хаһыат, edersaas.ru